Aqtaýda qandala ýlaımyn dep 6 jasar balanyń ólimine sebepshi bolǵan turǵyn sottaldy
Keleńsiz jaǵdaı osydan bir jyl buryn bolǵan edi. 13-shaǵyn aýdan 9-úıdiń turǵyny úıin «Kvıkfos» dárisimen ýlap, kórshilerine eskertpesten ketip qalǵan. Ár bólmege 4 tabletkany salyp, ventılıatsııa júıesin japqan. Mamandardyń aıtýynsha, atalǵan dári turǵyn úıge arnalmaǵan. Saldarynan joǵary qabattaǵy kórshiniń 3 birdeı balasy ýlanyp qalǵan edi.
«Bir úıdiń 4, 5 jáne 6 jastaǵy úsh balasy oblystyq kópbeıindi aýrýhanaǵa túsken. Ol jerge jedel járdem qyzmeti jetkizgen. Alaıda, ókinishke qaraı, aǵaıyndylardyń úlkenin dárigerler aman alyp qala almady. Dárigerler tıisti kómek kórsetkenimen búldirshinderdiń biri es jımastan qaıtys boldy. Qandalany ýlaý kezinde balaǵana emes, hımııalyq zattar ýly bolǵandyqtan eresekter de ólip ketýi múmkin»,-deıdi oblystyq densaýlyq saqtaý basqarmasynyń baspasóz hatshysy Nurbol Okýov.
Sol saqtyq sharalary bolmaǵandyqtan qaıǵyly jaǵdaı oryn aldy. Bul is boıynsha QR Qylmystyq kodeksiniń 104-baby 1-bólimi boıynsha is qozǵalǵan. Sot úkimimen ol kináli dep tanyldy.
«QR Qylmystyq kodeksiniń 304-baby 2-bóliginde kózdelgen qylmysty jasaǵany úshin kináli dep tanylyp, 2 jyl merzimge bas bostandyǵynan aıyryldy. Jazasyn qylmystyq atqarý qaýipsizdiginiń barynsha tómen mekemelerinde óteıdi»,-deıdi Aqtaý qalalyq sotynyń sýdıasy Aıda Bulaqbaeva.
Al, sottalýshy bul úkimmen kelispeıdi. Ol qorǵaýshysymen appeletsııalyq sotqa aryz bergen. Alaıda, 23 qańtarda bolǵan appelıatsııalyq sot bul aryzdy qanaǵattandyrmaı, úkim óz kúshinde qaldy.