Aqtaýda qalalyq aýrýhana salý josparlanýda

NUR-SULTAN. QazAqparat - Aqtaýda 32-shaǵynaýdanda kópbeıindi qalalyq aýrýhana salý josparlanyp otyr. Bul týraly oblystyq densaýlyq saqtaý basqarmasynyń basshysy Ánýar Saǵymbaev aıtyp berdi.

Ázirshe joba kúıinde daıyndalýda. 2019 jyly oblystyq aýrýhanada 82 myńnan astam adam emdelip shyqqan, 5 myń naýqasqa ota istelgen. Jalǵyz nysan barlyq fýnktsııany atqarady. Sondyqtan jańa ortalyq ashý qajettiligi týyndap otyr.

«Qalalyq aýrýhana joq. Jalǵyz oblystyq aýrýhana óńir turǵyndaryn qabyldaıdy, qala turǵyndaryn qabylaıdy, aýdandar bar. Qalalyq aýrýhana óte qajet. Joba jasalyp jatyr. 32-shaǵynaýdanda salǵyzǵymyz keledi. Jedel-járdem stantsııasy bolady», - deıdi Ánýar Saǵymbaev.

Sondaı-aq, Jańaózen qalasynda 50 oryndyq medıtsınalyq ortalyq salý josparlanýda. Munaı mekemeleriniń demeýshiligimen salynyp, 2021 jylǵa qaraı paıdalanýǵa beriledi.

Aıta keteıik, byltyr aımaqta 10-ǵa jýyq jekemenshik nysandaǵy medıtsınalyq mekemeler ashyldy. Barlyǵy da halyqaralyq standartqa saı jabdyqtalyp, ozyq tehnologııa, qurylǵylarmen jaraqtanǵan.