Aqtaýda ıt serýendetý máselesi turǵyndardy alańdatyp otyr
AQTAÝ. KAZINFORM — Aqtaý turǵyndary qalada ıtterdi jaýapsyz serýendetý men qańǵybas janýarlardyń kóbeıýine baılanysty alańdaýshylyq bildirgen. Turǵyndardyń aıtýynsha, kóptegen úı janýarlarynyń ıeleri ıtterin qarǵybaýsyz jáne tumyldyryqsyz serýendetip, olardyń artynan tazalamaıdy. Sonyń saldarynan aýlalar men jaıaý júrginshiler joldary lastanyp jatyr.
— Balalarymyz mektep pen kolledjge dál osy joldar arqyly qatynaıdy. Itterdiń erkin júrýi qaýip tóndiredi, — deıdi turńyndardyń biri.
Sonymen qatar, áleýmettik jelilerde 12-shaǵyn aýdandaǵy № 62 úı mańynda qańǵybas ıtterdiń mysyqty talap tastaǵany túsirilgen vıdeo tarady. Turǵyndardyń aıtýynsha, bul bir apta ishinde bolǵan ekinshi jaǵdaı. Olar ıtterdiń toptasyp, úıler, mektepter men balalar alańdarynyń mańynda jıi júretinin aıtady.
Atalǵan másele boıynsha, Aqtaý qalalyq turǵyn — úı sharýashylyǵy bólimi resmı jaýap berdi. Aıtýlarynsha, bıyl qańǵybas ıtterdi aýlaý jumystary júrgiziledi. Al, qańǵybas ıtterdi turaqty vaktsınatsııalaý jáne ıtterge arnalǵan pıtomnık salý jumystaryna qarjy qarastyrylmaǵan.
— 2026 jylǵy 13 mamyrda áleýmettik jelide Aqtaý qalasynyń 12-shaǵynaýdanyndaǵy № 62 turǵyn úı mańynda qańǵybas ıtterdiń mysyqty talap tastaǵany týraly aqparat jarııalandy. Osyǵan baılanysty aıtar bolsaq, qańǵybas ıtterdi aýlaý jumystaryna bıýdjetten qarajat bólingen. Qazirgi ýaqytta memlekettik satyp alý boıynsha konkýrstyq rásimderdi ótkizý josparlanýda. Konkýrs jeńimpazy anyqtalǵannan keıin merdiger mekeme tarapynan qala aýmaǵyndaǵy qańǵybas ıtterdi aýlaý jumystary júrgiziledi, — delingen habarlamada.
Úı janýarlaryn ustap, serýendetýge qatysty shaǵymdarǵa baılanysty oblystyq polıtsııa departamenti qazirgi zań talaptaryn eske saldy.
— Qoldanystaǵy talaptarǵa sáıkes, ıt ıeleri aınaladaǵy adamdardyń qaýipsizdigin qamtamasyz etýge, sanıtarlyq talaptardy saqtaýǵa, janýardyń nájisin tazalap júrýge jáne ıtterdiń óz betimen júrýine jol bermeýge mindetti. Sondaı-aq, ıtterdi balalar jáne sport alańdarynda serýendetýge, janýarlardy qaraýsyz qaldyrýǵa tyıym salynady. Al qaýipti tuqymdy ıtter qarǵybaý men tumyldyryqsyz serýendetilmeýi tıis, — delingen habarlamada.
Al, erejelerdi buzǵandarǵa 3 AEK kóleminde, ıaǵnı 12 975 teńge aıyppul qarastyrylǵan. Eger adam densaýlyǵyna nemese múlkine zııan kelse, aıyppul 10 AEK-ke deıin, ıaǵnı 43 250 teńgege deıin ósedi.
Buǵan deıin, Qaraǵandy oblysynda balasyn ıt talaǵan ana kinálilerge jaza qoldanýdy talap etken bolatyn.
Al, SQO-da ıt-mysyqtan zardap shekkender sany artqan.
