Aqtaýda iri mólsherdegi geroın esirtkisin ishegine salyp ótkizbek bolǵandar sottaldy
Mańǵystaý oblysynyń mamandandyrylǵan aýdanaralyq qylmystyq sotynda Irannan «Geroın» esirtkisi kontrabandasyn uıymdastyrǵany úshin ustalǵan úsh azamatqa úkim shyqty. Úsheýi de 16 jylǵa bas bostandyǵynan aıyryldy.
Bıyl qańtarda «A», «B», «V» esimdi úsh adam shekaradan ótkizý jáne paıda tabý maqsatynda Iran Islam Respýblıkasynan Qazaqstan Respýblıkasynyń Memlekettik shekarasy arqyly asa iri mólsherde «Geroın» esirtkisin Aqtaýǵa zańsyz tasymaldaýǵa aldyn ala ýaǵdalasqan.
«Irannyń Gorgan oblysynyń Jalın aýylynda 6 aqpanda sottalýshy «A» esimi belgisiz adamnan 2000 dollarǵa salmaǵy 899,44 gramm, 301 polıetılen paketke oralǵan geroın satyp aldy. Osydan keıin sottalýshylar «A», «B», «V» esirtki zattaryn jutyp, «Tegeran-Baký-Aqtaý» baǵyty boıynsha ushaqpen ushady. 10 aqpanda jedel-izdestirý is-sharalaryn júrgizý barysynda Qazaqstan Respýblıkasy Ulttyq qaýipsizdik komıteti Mańǵystaý departamentiniń qyzmetkerleri Aqtaý halyqaralyq áýejaıyna ushyp kelgen esirtki tasymaldaýshylardy quryqtaıdy. Olardy kompıýterlik tomografııamen tekserý kezinde ishekteri men asqazandarynan geroın tabylyp, tárkilendi», - delingen Mańǵystaý oblystyq sotynyń habarlamasynda.
Mańǵystaý oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshylar QR QK 286-babynyń 4-bóligi jáne 297-babynyń 3-bóliginiń 1,3-tarmaqtary boıynsha kináli dep tanyldy.
«Olardyń árqaısysyna 16 jylǵa bas bostandyǵynan aıyrý jazasy taǵaıyndaldy. Úkim zańdy kúshine engen joq»,-dep habarlady sottyń baspasóz qyzmeti.
Qarakóz Marat