Aqtaýda ıisshil ıttiń kómegimen eki nashaqor ustaldy
AQTAÝ. QazAqparat - Aqtaýda Ulttyq ulan jaýyngerleri ıisshil ıttiń kómegimen qos birdeı nashaqordy qolǵa túsirdi, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 7-shaǵynaýdanda oryn aldy.
Keshki saǵat 22.00 shamasynda quramynda 3-synypty serjant Ǵabıt Ǵadılov, qatardaǵy jaýyngerler Nıkolaı Nıkolaev, Qanat Qasymov jáne kınolog maman Talǵat Batyrshın bar top qyzmettik ıt Lızanyń kómegimen №17 úıdiń janynan ótip bara jatqan er adamdy ustady. It er adamnyń qasynan ketpeı, úrip, belgi berdi. Ony toqtatyp, teksergen kezde qaltasynan marıhýana tabyldy.
Jarty saǵattaı ýaqyttan keıin №21 úıdiń janynda kúdikti taǵy bir er adam qolǵa túsip, onyń da qaltasynan jasyl tústi esirtki zaty salynǵan orama shyqty. Lıza bul joly 48 jasar turǵynnan esirtki ısin sezdi. Bul er adam da qalalyq polıtsııa basqarmasyna jetkizildi.
Qyraǵylyǵy men kásibı is-áreketteri úshin atalǵan jaýyngerler bólim komandırimen yntalandyryldy.
