Aqtaýda halyqaralyq týrıstik forým ótti
ASTANA. KAZINFORM — Aqtaýda Týrızm jáne sport mınıstrligi men Mańǵystaý oblysy ákimdiginiń qoldaýymen Mangystau International Tourism Forum ótti. Bul týraly QR Týrızm jáne sport mınıstrligi habarlady.
Forýmǵa halyqaralyq uıymdardyń ókilderi, sonyń ishinde TÚRKSOI men Ekonomıkalyq Yntymaqtastyq Uıymy (EYU), sondaı-aq memlekettik qurylymdar, bıznes ókilderi, ınvestorlar jáne sarapshylar qatysty.
Negizgi maqsat — óńirdiń týrıstik jáne ınvestıtsııalyq áleýetin tanystyrý, Ortalyq Azııadaǵy týrızmdi damytý perspektıvalaryn talqylaý jáne halyqaralyq yntymaqtastyqty keńeıtý.
Baǵdarlama aıasynda ınvestıtsııa tartý, kólik qoljetimdiligi, medıtsınalyq, oqıǵalyq jáne jappaı týrızmdi damytý máselelerine arnalǵan plenarlyq otyrystar josparlanǵan.
— Týrızmdi damytý — memlekettiń basym baǵyttarynyń biri. Іshki jáne kelý týrızmin qoldaý, qolaıly ınvestıtsııalyq ahýal qalyptastyrý jáne bızneske jańa múmkindikter ashý baǵytynda memleket naqty sharalar qabyldap jatyr. Bıyl Mańǵystaý oblysyn damytýdyń 2025-2029 jyldarǵa arnalǵan keshendi jospary bekitildi. Qujat aıasynda jalpy quny 401 mlrd teńgeni quraıtyn 100-den astam is-shara qarastyrylǵan. Bul forým óńir úshin jańa múmkindikter ashatyn mańyzdy qadam bolmaq, — dedi Erbol Myrzabosynov forýmnyń ashylý saltanatynda.
Sondaı-aq elge sheteldik týrısterdi tartý úshin qolaıly jaǵdaı jasalǵan. Búginde Qazaqstanǵa 87 eldiń azamattary vızasyz kire alady, al 30 memleketpen tikeleı áýe reısteri ashylǵan. Budan bólek, «áýe keńistiginiń besinshi erkindigi» rejımi qoldanylady. Munyń barlyǵy Qazaqstannyń halyqaralyq saıahatshylar úshin tartymdylyǵyn aıtarlyqtaı arttyrady.
Mańǵystaý oblysynyń ákimi Nurdáýlet Qılybaı óńirdiń týrıstik salasyn damytýǵa toqtalyp, ınfraqurylymdyq jobalardyń qarqyndy iske asyrylyp jatqanyn atap ótti.
— Mańǵystaý — tek munaı men gaz ǵana emes, sondaı-aq qaıtalanbas tabıǵı jáne mádenı murasy bar erekshe óńir. Prezıdent tapsyrmasyna sáıkes, biz oblysty týrıster men ınvestorlar úshin tartymdy ortalyqqa aınaldyrý baǵytynda júıeli jumys júrgizip jatyrmyz. Týrızmdi damytý úshin qolaıly jaǵdaı jasalýda. Degenmen eń bastysy — bul baǵytta ekologııaǵa jáne qorshaǵan ortaǵa zııan keltirýge jol bermeýimiz kerek. Sonymen birge ulttyq qundylyqtarymyz ben mádenıetimizdi saqtaý mańyzdy. Qazirgi maqsat — qazaqtyń dástúrli zańdylyqtary men ulttyq dástúrlerin saqtaı otyryp, Mańǵystaýǵa týrızmdi barynsha damytý, — dedi Nurdáýlet Qılybaı.
Mańǵystaý óńiri Qazaqstannyń týrıstik kartasynda aıryqsha orynǵa ıe. Kaspıı teńiziniń jaǵalaýy, Bozjyra men Qyzylkúp shatqalynyń qaıtalanbas landshafttary, baı tarıhı-mádenı murasy aımaqty Ortalyq Azııadaǵy eń áleýetti týrıstik baǵyttardyń birine aınaldyrady.
Aqtaýdaǵy forým elimizdiń jáne búkil óńirdiń týrızm salasyna tyń serpin berip, halyqaralyq áriptestikti nyǵaıtýǵa jáne ınvestıtsııalyq múmkindikterdi keńeıtýge jol ashady.
Aıta keteıik, mınıstr Erbol Myrzabosynov Aqtaýda basketboldan Qazaqstan kýboginiń jeńimpazdarymen kezdesti.