Aqtaýda gaz jarylysy bolǵan úıdiń turǵyndary áli kúnge deıin turmystyq gazsyz otyr

AQTAÝ. KAZINFORM — Aqtaý qalasyndaǵy 32 V shaǵyn aýdany 83-úıdiń turǵyndary byltyr kúzden beri úılerine gaz berilmegenine shaǵymdandy. Olar jarty jyldan beri quzyrly organdardyń tabaldyryǵyn tozdyryp, tushymdy jaýap ala almaǵan. 

Turǵyndardyń aıtýynsha 2025 jylǵy 28 qazanda úıdiń jertólesynda turmystyq gaz jarylysy bolyp, páterlerge gaz berý toqtatylǵan.

Alaıda, sodan beri áli kúnge deıin turmystyq gaz berilmegen. Biraq, qurylys salýshy jerasty qubyryn qazandyqqa jáne kórshiles turǵyn úı keshenderine gaz berý úshin paıdalanýdy jalǵastyryp jatyr.

— Qurylys salýshy bizdiń páterlerdi gaz júıesine qosýdy ádeıi buǵattap otyr. Sebebi, múlik ıeleri birlestigine qasbettik jelilerdi balansyna alýdy talap etýde. Osylaısha kompanııa jelilerdi montajdaý kezindegi yqtımal zań buzý men jarylystyń saldary úshin jaýapkershilikten jaltarýǵa tyrysyp otyr, — deıdi turǵyndar.

Aqtaý qalalyq ákimdigi baspasóz qyzmetiniń habarlaýynsha, turǵyndardyń osy máselesi boıynsha búgin ákimdikte jıyn josparlanǵan. Nátıjesi qosymsha jarııalanady. 

Eske salaıyq, byltyr 28 qazanda 32 V shaǵyn aýdanyndaǵy «Asııa» turǵyn úı kesheniniń jertólesinde gaz jarylysy boldy. Saldarynan 5 adam, onyń úsheýi jasóspirim zardap shekti. Osy oqıǵa boıynsha qylmystyq is qozǵalǵan bolatyn.

Aqtaýda turǵyn úı jertólesinde jarylys bolyp, 5 adam zardap shekti.