Aqtaýda evakýatsııalyq ortalyqtar sany úsh esege azaıdy
AQTAÝ. KAZINFORM — Atyraý oblysynyń Jylyoı aýdanyndaǵy sý tasqyny kezinde Mańǵystaýǵa evakýatsılanǵan adamdardyń úsh bir bóligi úılerine oraldy.
Qazirgi ýaqytta Mańǵystaý oblysynda evakýatsııalyq pýnttegi adamdar sany azaıǵany baıqalyp otyr.
Aqtaý qalasy ákimi apparatynyń Tótenshe jaǵdaılar jáne azamattyq qorǵanys jónindegi bas ınspektorynyń málimeti boıynsha, sý tasqyny bastalǵanda oblys ortalyǵynda 24 evakýatsııalyq pýnkt uıymdastyrylǵan.
«Eń kóp eseptik kórsetkish boıynsha 10 sáýirde 1756 adam ornalasty. Qazirgi tańda tek 7 evakýatsııalyq pýnktte adamdar ýaqytsha turyp jatyr. Olardyń sany 878 adamdy quraıdy. Jaqyn týysqandarynyń úılerine nemese ózderi ornalasqandar sany 224 adamdy quraıdy», — dedi qalalyq ákimdik apparatynyń tótenshe jaǵdaılar jáne azamattyq qorǵanys jónindegi bas ınspektory.
Al Beıneý aýdanynda Qulsarydan evakýatsııalanǵan 18 myńǵa jýyq adam bar. Bul týraly aýdan ákimdiginiń ókili málimdedi.
«Boranqul aýylynda 4 evopýnkt bar. «Orda», «Kerýen» kempıngteri, «Nobılıs» JShS jataqhanasy men «Móldir» kafesinde 55 adam ýaqytsha qonystanǵan. Beıneý aýylynda «QazAvtoJol» AQ-nyń jataqhanasy, «Araı» qonaqúıi, «Elıt» kafesi, «Aqsalım» saýda ortalyǵy, «Aıbı» kafesinde jalpy 138 adam bar. Beıneý aýdany boıynsha evakýatsııalanǵan 17 595 adam bar. Evakýatsııalanǵan pýnkterge ornalasqandardan ózgeleri jaqyn týystarynyń úılerine ornalasqan», - dedi aýdan ákimdiginiń baspasóz qyzmetindegiler.
Búginde evakýatsııalyq ortalyqtaǵy Atyraý oblysynan kelgen turǵyndarǵa qajetti zattar men tıisti azyq-túlik qoryn eriktiler jetkizip berip otyr. Bul oraıda oblysta eriktiler toby qurylyp, gýmanıtarlyq kómek jınaý jolǵa qoıylǵan. Sonymen qatar, Mańǵystaý oblystyq jastar resýrstyq ortalyǵy eleýli úles qosyp otyr.
Sondaı-aq, Mańǵystaý oblysyna sý tasqynynan evakýatsııalanǵan turǵyndarǵa Qyrǵyzstan Respýblıkasynan 2 júk kóligine tıelgen 40 tonna shamasynda gýmanıtarlyq kómek jetkizildi.
«Gýmanıtarlyq kómektiń qatarynda sary maı, irimshik, aıran, qaımaq, shujyq, untaqtalǵan sút ónimderi bar. Olardyń barlyǵy óńirimizdegi evakýatsııalyq pýnkterde jatqan turǵyndarǵa taratylatyn bolady», — dep málimdedi óńirlik qoǵamdyq kommýnıkatsııalar qyzmeti.
Sý tasqynynan keıin Aqtaýda Atyraý oblysynan evakýatsııalanǵandarǵa arnalǵan qoǵamdyq kómek shtaby ashylǵan bolatyn.
Budan bólek, Keshe sý tasqynynyń aldyn alý boıynsha Mańǵystaýdan Atyraýǵa arnaıy tehnıkalar jiberildi.