Aqtaýda Eýropa men Azııany baılanystyratyn iri logıstıkalyq baza salynady
AQTAÝ. KAZINFORM - 2026 jyly «Aqtaý teńiz porty» arnaıy ekonomıkalyq aımaǵy aýmaǵynda jalpy quny 64 mlrd teńge bolatyn 14 ınvestıtsııalyq jobany iske asyrý josparlanyp otyr. Atalǵan jobalar nátıjesinde 1629 jańa jumys orny qurylmaq. Bul týraly Qoǵamdyq kommýnıkatsııa ortalyǵynda ótken brıfıngide «Aqtaý teńiz porty» AEA» AQ basqarma tóraǵasy Múbárak Tólegenov málimdedi.
Josparlanǵan ınvestıtsııalyq bastamalar óńirdiń óńdeý ónerkásibin damytýǵa, óndiristik qýatty arttyrýǵa jáne kólik-logıstıkalyq ınfraqurylymdy nyǵaıtýǵa baǵyttalǵan.
Aqtaýda Eýrazııalyq jetkizý tizbeginiń bazasy salynady. Joba aıasynda teńiz, temirjol jáne avtokólik ınfraqurylymdaryn biriktiretin zamanaýı logıstıkalyq ortalyqtar qurylyp, konteınerlik tasymal, saqtaý jáne qaıta óńdeý qyzmetteri damytylady. Bul baza Transkaspıı halyqaralyq kólik dáliziniń ótkizý qabiletin arttyryp, óńir ekonomıkasyn damytýǵa, jańa jumys oryndaryn ashýǵa jáne Qazaqstannyń tranzıttik áleýetin kúsheıtýge múmkindik beredi. Investıtsııa kólemi - 10 mlrd teńge.
Keler jyly sondaı-aq, AEA aýmaǵynda elektr ótkizgishter men elektrmontajdyq quraldar, polıpropılen, polıetılen, termoýsadka jáne streıch plenka, sý tazalaý fıltrleri, gıpsokarton jáne asfaltobeton qospasy óndiristerin iske qosý kózdelip otyr. Sonymen qatar qara jáne tústi metall qaldyqtaryn qaıta óńdeıtin shaǵyn zaýyt, nasostyq shtangalar, aldyn ala oqshaýlanǵan jáne polıetılen qubyrlar shyǵaratyn kásiporyndar ashylmaq.
Aıta keteıik, qazirgi tańda «Aqtaý teńiz porty» AEA aýmaǵynda 57 qatysýshy tirkelgen. Onyń 27 jobasy iske qosylǵan, al 30 joba júzege asyrylý satysynda. Sonymen qata, jalpy ınvestıtsııa kólemi 482,6 mlrd teńge bolatyn 14 áleýetti iri ınvestıtsııalyq jobadan turatyn pýl qalyptastyryldy. Bul jobalar aıasynda shamamen 1 300 jańa jumys ornyn ashý josparlanyp otyr.
Buǵan deıin Aqtaýda aýyz sý tapshylyǵy tolyǵymen joıylǵanyn jazǵan bolatynbyz.