Aqtaýda esirtki saqtaýmen jáne taratýmen aınalysqan birneshe kúdikti qolǵa tústi

AQTAÝ. KAZINFORM – Mańǵystaý oblysynda «Quqyqtyq tártip» jedel-profılaktıkalyq is-sharasy aıasynda esirtki zattarynyń zańsyz aınalymyna qatysy bar kúdiktiler qolǵa tústi, dep habarlaıdy Kazinform agenttigi.

Naqtylap aıtsaq, Mańǵystaý oblystyq Polıtsııa departamentiniń Ekstremızmge qarsy is-qımyl basqarmasy qyzmetkerleri oblystyq prokýratýranyń úılestirýimen, «SOBR» arnaıy jasaǵynyń jáne «Kıra» esimdi qyzmettik ıttiń qatysýymen «Quqyqtyq tártip» jedel-profılaktıkalyq is-sharasy aıasynda esirtki zattarynyń zańsyz aınalymyna qatysy bar tulǵalardy anyqtaý jáne ustaý boıynsha aýqymdy operatsııa júrgizgen. Nátıjesinde Aqtaý qalasynda esirtki zattaryn saqtap, taratýmen aınalysqan 3 kúdikti ustaldy.

Birneshe mekenjaıdy tintý barysynda polıtseıler iri kólemdegi marıhýana tárkilegen. Sonymen qatar, elektrondy tarazylar, oraý materıaldary men pnevmatıkalyq qarý tabyldy.

Qosymsha tergeý amaldary kezinde ustalǵandardyń biriniń turǵylyqty úıiniń jertólesinen tórt qorapqa salynǵan, salmaǵy 100 keliden asatyn marıhýana jasyrylǵan qoıma anyqtalǵan.

– Tárkilengen esirtki zattarynyń jalpy salmaǵy 196 kelini qurady. Sot-hımııalyq saraptama nátıjesinde tárkilengen zattyń marıhýana ekeni anyqtaldy. Atalǵan derek boıynsha Qylmystyq kodekstiń 297-babynyń 3-bóligi boıynsha sotqa deıingi tergep-tekserý bastaldy. Sot sheshimimen kúdiktiler eki aı merzimge tergeý ızolıatoryna qamaýǵa alyndy, – delingen habarlamada.

Buǵan deıin, Mańǵystaýda 62 kg marıhýana, qarý-jaraq pen 32 mln teńge tárkilengenin habarlaǵanbyz.