Aqtaýda eresekterge arnalǵan balabaqsha ashyldy

 Baldyrǵandardyń bal mekeni - aǵa býyn úshin psıhologııalyq trenıng ortalyǵy. Kúıbeń tirshilikten qol úzip, sanasyn sergitýdi oılaıtyndar úshin esik ashyq, dep habarlaıdy 24.kz. 

«Balabaqshada ótken úsh saǵatta otyz jasqa jasardym. Basynda qolaısyz kóringen kishkentaı oryndyqtarǵa keıin boı úırendi. Kóńildi oıyn oınap, ustazdyń qımylyn qaıtalap, máre-sáre boldyq»,-deıdi  eki balanyń anasy Meıirbıke Áıgerim.

Munda jumystan bólek, tynymsyz úı tirliginen sergiter úıirme tapqanyna qýanyshtylar az emes. Solardyń biri - eresekterge arnalǵan balabaqsha oqýshysy Áıgerim Daýymova. «Kóńilim kóterińki. Sabaq unady. Rasynda da, ótken balalyq shaqqa qaıta oraldym. Sanam sergip qaldy»,-deıdi ol.

Aıryqsha balabaqshaǵa kezektiń qarasy qalyń. Adamdar munda máseleden boı tasalaý úshin emes, oǵan núkte qoıý úshin keledi. Úıirme jetekshisi Irına Hohlovanyń aıtýynsha, balalyq shaqta qalyptasar kemshilikten arylýdyń erte-keshi joq.

Eresekterge arnalǵan balabaqsha dırektory Irına Hohlovanyń pikirinshe,  «meniń qolymnan barlyǵy keledi» degen sóz balalyq kezeńde ár adamnyń ustanymy bolýy qajet. Óıtkeni áli kúnge deıin ózine senimdiligi qalyptaspaǵan azamattar bar.

«Biz olardy qabyldap, aldymen kóńilin kóteremiz. Munan soń, psıholog retinde keńes beremiz»,-deıdi ol.

Kóp uzamaı Jańa jyl merekesine daıyndyq bastalady. Osynda ár oqýshy óziniń ónerin usynady. Taǵy bir aıta keter jaıt, balabaqshaǵa zeınetkerler de qabyldanady. Qarııalar úshin arnaıy oqý baǵdarlamasy jasaqtalǵan.