Aqtaýda er adam emhananyń 6-qabatynan sekirmek boldy

AQTAÝ. QazAqparat - Aqtaýda er adam №1 qalalyq emhananyń altynshy qabatyndaǵy terezeden sekirip, óz-ózine qol salmaq boldy, dep habarlaıdy QazAqparat tilshisi.

Abyroı bolǵanda, polıtseıler der ýaqytynda jetip, ony qutqaryp qaldy. Bul týraly Mańǵystaý oblystyq Polıtsııa departamentiniń baspasóz qyzmetinen málim etti.

Oqıǵa 19 maýsymda bolǵan. Er adamnyń áreketin kóshede ketip bara jatqan turǵyndar baıqaǵan. Kýá bolǵandardyń aıtýynsha, olar ony tynyshtandyrýǵa tyrysqan.

«Polıtsııaǵa shaqyrtý sol jerdegi kýágerlerden tústi. Oqıǵa ornyna dereý polıtsııa qyzmetkerleri jiberildi. Sol jerde joǵaryǵa kóterilý týraly sheshim qabyldanǵan. Er adammen sóılesý arqyly, ony tynyshtandyryp, keri túsýge kóndirdik. Qazir ol psıhıatrııalyq dıspanserge jiberildi», - dedi polıtsııadan.