Aqtaýda epıdemıologııalyq rejımniń saqtalýyn 5 mobıldi top baqylaıdy
AQTAÝ. QazAqparat – Aqtaý qalasynyń ákimi Nurdáýlet Qılybaı karantın rejımin qamtamasyz etý jumystaryn kúsheıtý boıynsha jıyn ótkizdi, dep habarlaıdy QazAqparat tilshisi.
Jıynǵa sheneýnikterden bólek, Aqtaý qalalyq Taýarlar men qyzmetterdiń sapasy men qaýipsizdigin baqylaý basqarmasynyń basshysy Asıma Jumabaıqyzy, polıtsııa qyzmetkeleri men bólim basshylary qatysty.
Asıma Jumabaıqyzy halyq kóp shoǵyrlanǵan ortalyqtarda, qoǵamdyq tamaqtaný oryndarynda karantın rejımin saqtaý, monıtorıng jumystaryn kúsheıtý, kásipkerlik sýbektileriniń shekteý sharalaryn saqtaýdy qamtamasyz etý máselelerine toqtaldy.
«Aqtaý qalasynda koronovırýs ınfektsııasynyń taralýynyń aldyn-alý maqsatynda saqtyq sharalaryn qazirden bastaýymyz kerek. Monıtorıng jumystary bar. Kún salqyndaǵan saıyn aýrý beleń alyp keledi. Aqtaýda bir kúnde 15 adam tirkeldi. Kásipkerlik sýbektileri de shekteý sharalaryn ustaný qajet»,-dedi Asıma Jumabaıqyzy.
Kún saıyn qalada epıdemıologııalyq rejımniń saqtalýyn qamtamasyz etý maqsatynda shamamen 5 mobıldi top jumys isteıdi. Monıtorıng toptary kásipkerlik sýbektilerinde betperde, antıseptık, tazalyqtyń bolýy, araqashyqtyqtyń saqtalýy boıynsha sonymen birge, qala turǵyndarynyń shaǵymy boıynsha qaraıdy. Jıyn sońynda qala ákimi Nurdáýlet Qılybaı bólim basshylaryna jergilikti polıtsııamen, epıdemıologııalyq qyzmetpen birlesip qala turǵyndarynyń engizilgen shekteý sharalaryn saqtaýyn qamtamasyz etýdi tapsyrdy.
