Aqtaýda eks-depýtat jeke klınıkada ota kezinde komaǵa túsip, kóz jumdy
AQTAÝ. KAZINFORM — Mańǵystaý oblystyq máslıhatynyń eks-depýtaty Erbol Aıtýov Aqtaýdaǵy klınıkada jasalǵan mentoplastıkadan keıin kóz jumdy. Depýtat ıeginiń astyndaǵy artyq maıdy aldyrǵysy kelgen. Alaıda klınıkaǵa óz aıaǵymen barǵan er adam operatsııa kezinde ınsýlt alyp, 1 aı komada jatyp, qaıtys bolǵan.
Mańǵystaý oblystyq máslıhatynyń eks-depýtaty jáne «KazPetroDrilling» kompanııasynyń Mańǵystaý oblysy boıynsha vıtse-prezıdenti Erbol Aıtýov 4 sáýir kúni ıek astyndaǵy artyq maıdy aldyrý úshin «Qasıet» jekemenshik klınıkasyna operatsııaǵa barǵan.
Jubaıy Laýra Aıtýovanyń aıtýynsha, anestezııa durys berilmeı joldasynyń qan qysymy men qant mólsheri kóterilip, komaǵa túsken.
— 13:40 shamasynda ota jasaıtyn hırýrg Artýr Tajıev habarlasyp, onyń qan qysymy kóterilgenin ǵana aıtty. Jedel járdemmen oblystyq aýrýhanaǵa jetkizý kerek dedi. Onyń komaǵa túskenin eskertpedi. Sonda 9:40–ta komaǵa tússe, nege 13:40–qa deıin kútken?! 4 saǵat boıy alǵashqy kómek kórsetilmegen, narkozdan shyǵaratyn dárini salmaǵan, ottegi apparatyna qospaǵan, eshqandaı shara qoldanbaǵan, — deıdi marqumnyń áıeli.
Jeke klınıkadan oblystyq aýrýhanaǵa jetkizilgen naýqas sol kúıi esin jımastan bir aı jatyp, til tartpaı ketken.
Densaýlyq saqtaý mınıstrliginiń medıtsınalyq jáne farmatsevtıkalyq baqylaý komıtetiniń Mańǵystaý oblysy boıynsha departamenti osy jaǵdaıǵa qatysty túsinikteme berdi. Olar «Qasıet» klınıkasyn tekserip, kóptegen zańbuzýshylyq anyqtalǵanyn jetkizdi.
— Ortalyqtyń hırýrgııalyq ota bólimi talapqa sáıkes medıtsınalyq qurylǵylarmen tolyqqandy jabdyqtalmaǵany, ota zalyndaǵy medıtsınalyq qurylǵylardyń tehnıkalyq merzimi ótip ketkeni, «anafılaksııalyq shokqa qarsy» arnaıy aspaptardyń joq ekeni anyqtaldy. Sondaı-aq, ota bóliminde jedel kómek kórsetý jabdyqtary talapqa saı kelmeıdi. Naýqastyń zerthanalyq taldaýy tolyq bolmaı, taldaýdaǵy nátıjesi eskerilmeı, metabolıkalyq buzylystaryn túzetpeı, medıtsınalyq qarsy kórsetilim bolsa da, otaǵa jibergen. Sátsiz ıntýbatsııa anestezııa kezinde arterııalyq qysymnyń kóterilýi men mı gıpoksııasynyń basty sebebi bolýy múmkin, — delingen habarlamada.
Departament tarapynan Ákimshilik quqyqbuzýshylyq týraly kodekstiń 464-baby boıynsha «Lıtsenzııalaý normalaryn nemese ruqsat berý rásimderin buzý» boıynsha hattama toltyrylǵan. Tekseris qorytyndysy prokýratýraǵa joldanbaq.
Buǵan deıin, Almatyda plastıkalyq hırýrgııa klınıkasynda tanymal bloger kóz jumǵan bolatyn.
