Aqtaýda eks-basshyǵa jymqyrǵan somadan 10 ese kóp aıyppul salyndy
AQTAÝ. KAZINFORM — Aqtaýda «Aqtaý elektr jelileri basqarmasy» memlekettik kommýnaldyq kásipornynyń burynǵy basshysy alaıaqtyq jasaǵany úshin sottaldy. Sot úkimine sáıkes, ol qol astyndaǵy qyzmetkerlerden 2,73 mln teńge jınap, jeke basynyń qajetine jumsaǵan. Sot oǵan jymqyrylǵan somadan on ese kóp, ıaǵnı 27,3 mln teńge aıyppul saldy.
Sot materıaldaryna sáıkes, 2026 jyldyń maýsymynda kásiporyn basshysy qyzmetkerlerge prokýratýra tekseris júrgizýi múmkin ekenin aıtyp, 20 mln teńge aıyppul salynýy yqtımal ekenin jetkizgen. Onyń sózinshe, máseleni 3 mln teńgege sheshýge bolatyn bolǵan. Aqshany sol kúni jınaý talap etilgen.
Іs materıaldaryna sáıkes, basshylyqpen áńgimeden keıin qyzmetkerlerge 300 myń teńgeden avans berilgen. Árqaısysy osy somadan 273 myń teńgeden tapsyrǵan. Nátıjesinde 2,73 mln teńge jınalǵan. Sot anyqtaǵandaı, kásiporyn basshysy bul aqshany ıemdenip, jeke maqsatyna paıdalanǵan.
Alaıda sot úkiminde kórsetilgendeı, 2026 jyly prokýratýra kásiporynda tekseris júrgizbegen.
Sot er adamdy memlekettik fýnktsııalardy oryndaýǵa ýákilettik berilgen adamdarǵa teńestirilgen tulǵanyń alaıaqtyq jasaǵany úshin kináli dep tanydy. Jaza taǵaıyndaý kezinde materıaldyq zalaldy óteýi, kámeletke tolmaǵan balalarynyń bolýy jáne jasaǵan isine ókinýi eskerilgen. Jazany aýyrlatatyn mán-jaılar anyqtalmaǵan.
Aıyppuldan bólek, sottalǵan azamat ómir boıyna memlekettik qyzmette, memlekettik uıymdarda jáne kvazımemlekettik sektor sýbektilerinde laýazym atqarý quqyǵynan aıyryldy. Sondaı-aq jábirlenýshilerge ótemaqy tóleý qoryna 86 500 teńge jáne sot saraptamasyna jumsalǵan shyǵyn retinde 840 teńge 50 tıyn óndirip alý týraly sheshim shyǵaryldy. Al 2,73 mln teńge memleket kirisine tárkilenedi.
2026 jylǵy 11 tamyz ben 1 qazan aralyǵynda qamaýda bolǵan ýaqyty aıyppul esebine jatqyzylǵan. Osyǵan baılanysty tólenýge tıis aıyppul mólsheri 26 mln 417 myń 700 teńge bolyp belgilendi. Úkim jarııalanǵannan keıin er adam sot zalynda qamaýdan bosatylǵan.
Eske salaıyq, buǵan deıin Petropavl mektebinde 89 mln teńge jymqyrylǵan: býhgalter men muǵalim sottalǵanyn jazǵan edik.
