Aqtaýda ekopýnkt ashyldy
«Ulttyq mereke qarsańynda ekopýnkt ashyldy. Bul joba ekologııalyq máselelerdi sheshýge kómek beredi. Bárińizge belgili, qorshaǵan ortanyń tazalyǵy - búgingi tańda álemdik deńgeıdegi kúrdeli másele. Sol sebepti árbirińizdi osyndaı bastamalarǵa qoldaý kórsetýge shaqyramyn. Jańa Qazaqstan ózimizden bastalatynyn umytpaıyq!- dedi Aqtaý qalasy ákiminiń orynbasary Ábdesh Túrkmenbaev.
Joba 2019 jyly bastalyp, alǵashqy núktesi Jańaózen qalasynda ashylǵan.
«Ekopýnkt tazalyq mádenıetin qalyptastyrady. Turmystyq qaldyqtardy óńdeýge tapsyrý arqyly álemdi qoqystan qutqaramyz. Plastıkalyq bótelkelerdi, qaǵazdy, karton men alıýmınıı bankalardy, plastık qoraptar men hımııalyq qaldyqtardyń flakonyn tapsyrý arqyly aqsha alýǵa bolady, -dedi «Qaita ondeu» JShS dırektory Bekjan Tursynmaǵambetov.
Aıta keteıik, jańa ekopýnktqa plastıkalyq qaldyqtardy qabyldaıtyn fandomat qoıyldy.
