Aqtaýda eki kólik soqtyǵysyp, júrgizýshi kóz jumdy
Qaıǵyly oqıǵa 19 qazan saǵat 21:10 shamasynda bolǵan.
Aqtaý qalasy polıtsııa basqarmasynyń «102» kezekshi pýltine «Kaspıı Bıtým» mekemesi janyndaǵy jol-kólik oqıǵasy týraly shaqyrý túsken.
Anyqtalǵandaı, «Nissan Terrano» avtokóliginiń júrgizýshisi basyp ozý kezinde qarsy jolaqqa shyǵyp, qarsy jolda kele jatqan «Lada 21703» avtokóligimen soqtyǵysqan.
«Jol apaty saldarynan «Lada 21703» avtokóliginiń júrgizýshisi alǵan jaraqatynan oqıǵa ornynda kóz jumdy. Zardap shekken jolaýshy Mańǵystaý oblystyq aýrýhanasyna jetkizildi», - delingen oblystyq polıtsııa departamentiniń baspasóz qyzmeti taratqan habarlamada.
Qazir tergeý amaldary júrgizilip jatyr.
Esterińizge sala keteıik, dál sol kúni joldyń tyıym salynǵan jerin kesip ótpek bolǵan jaıaý júrginshini kólik qaǵyp ketkenin habarlaǵan bolatynbyz.
Jol-kólik oqıǵasy saldarynan 59 jastaǵy er adam oqıǵa ornynda alǵan jaraqatynan kóz jumdy.