Aqtaýda eki adam hımııalyq zattan ýlanyp, kóz jumdy

AQTAÝ. QazAqparat - Aqtaýda eki adam hımııalyq zattan ýlaný saldarynan kóz jumdy. Taǵy 6 adam shuǵyl túrde aýrýhanaǵa jatqyzyldy, dep habarlaıdy QazAqparat tilshisi oblystyń qoǵamdyq kommýnıkatsııa ortalyǵyna silteme jasap.

Quzyrly organdar anyqtaǵandaı, Aqtaý qalasynyń turǵyny «Kvıkfos» preparatymen (jándikterge qarsy preparat) kórshilerin eskertpesten óz páterin dezınfektsııalaıdy. Páterin zalalsyzdandyryp bolǵan soń, úıin kilttep basqa shaǵynaýdanǵa ketken. Keıin kórshileriniń densaýlyǵy nasharlaı bastaǵan. Saldarynan kórshi áıel men onyń qyzy kóz jumdy. Atalǵan is boıynsha sot-medıtsınalyq saraptama taǵaıyndaldy.

Osy fakt Aqtaý qalasynyń polıtsııa basqarmasyna QR QK 304 baby 3-bólimine sáıkes tirkeldi.

Qazirgi tańda Aqtaý qalasynyń polıtsııa basqarmasy páterin dezınfektsııalaǵan turǵynnyń jeke basyn anyqtady. Qylmystyq is boıynsha sotqa deıingi tergeý júrip jatyr.