Aqtaýda eki balanyń qazasyna sebepshi bolǵan kórshisi 10 jylǵa sottalýy múmkin
Aqtaýda qos búldirshinniń qazasyna abaısyz áreket etken kórshisi aıypty. Kúdikti 5 jyldan 10 jylǵa deıin bas bostandyǵynan aıyrylýy múmkin. Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblysy polıtsııa departamenti tergeý basqarmasy bastyǵynyń orynbasary Nuralın Barjıkov málim etti, dep habarlaıdy Kazinform.
Ótken senbi, ıaǵnı 21 qazanda 7-shaǵynaýdandaǵy páterlerdiń birinde kórshisiniń qandalany ýlaǵanynan eki bala qaıtys bolǵan edi.
Qazirgi tańda ýlanǵan eki náresteniń qaza bolý faktisi boıynsha tergeý júrip jatyr. Oqıǵa ornyna jedel-tergeý toby barǵan.
Sol páterge kórshi turatyn áıel keshki saǵat 17:00–de páterdi beımálim quralmen ýlap, kórshilerine eskertpesten týysynyń úıine ketken.
— Atalǵan derek QR Qylmystyq kodeksiniń 304-baby 3-bóligi (sanıtarııalyq qaǵıdalardy buzý deregi) boıynsha tirkelip, saraptama taǵaıyndaldy, — dedi Nuralın Barjıkov.
Ýlanǵan eki bala qaıtys bolyp, úıdegi taǵy bes adam aýrýhanaǵa jetkizilgen.
— Olarǵa tıisti em-dom jasalyp, qazirgi tańda 3 eresek adam úıine shyqty. Al bir jasóspirim jansaqtaý bóliminen jalpy bólimshege shyǵaryldy. Taǵy bir balanyń jaǵdaıy birqalypty, — dedi Mańǵystaý oblystyq densaýlyq saqtaý basqarmasy basshysynyń orynbasary Bıbizada Dúısenbaeva.
Al Aqtaý qalalyq sanıtarııalyq-epıdemıologııalyq basqarmasynyń basshysy Asıma Jarylǵasova turǵyndardy úı-jaıdy dezınfektsııalatyn kezde oǵan arnalmaǵan ónimderdi qoldanbaýǵa shaqyrdy.
— Páterdi zııankes jándikterden zalalsyzdandyrý úshin ýlaý jumysyn óz betinshe júrgizýge tyıym salynady. Ony ruqsaty bar arnaıy mamandyrylǵan mekemeler jasaıdy, mundaı shara jaýapkershilikti talap etedi. Bul jaǵdaıda óz densaýlyǵyńyz ǵana emes, ózgelerdiń, ıaǵnı kórshilerdiń de ómirine jaýapkershilik alasyzdar. Sondyqtan saqtyq sharalaryn qatań saqtaýǵa jáne ózgeniń ómirine salǵyrt qaramaýǵa shaqyramyz, — dedi Asıma Jarylǵasova.
Turǵyndar Aqtaý qalasynda tirkelgen myna zalalsyzdandyrý beketterine habarlasa alady:
1. «Dezınfektsııa — Temirjoly» mekemesi — 87014980227, 87016236595
2. PK «Medık gıgıenıst» — 50-13-91, 87013508316
3. IP Izbasova S — 87759208188
4. TOO «ProfDezGarant» — 50-10-96, 87771111859
5. TOO «Kaspıı Stroı Konsaltıng» — 33-49-90, 87014104282
6. TOO «Mangıstaý Sanatsııa Aktaý — 87017802291, 87012495152
7. TOO „Kaspi Qizmet“ — 87013874422
8. QR Densaýlyq saqtaý mınıstrliginiń Mańǵystaý oblysy boıynsha QOO3 „Ulttyq saraptama ortalyǵy“ — 50-32-94, 87755516797
