Aqtaýda eki adam qaza tapqan kater apatyna qatysty jańa derekter jarııalandy
AQTAÝ. KAZINFORM — Aqtaýda Kaspıı teńizinde katerdiń apatqa ushyraýyna qatysty jańa málimetter belgili boldy.
Mańǵystaý oblystyq tótenshe jaǵdaılar departamentiniń tótenshe jaǵdaılardy joıý basqarmasynyń bastyǵy Baqytjan Úsenovtiń aıtýynsha, kater teńizden shyǵyp turǵan jartastyń bóligine soǵylyp, sýǵa bata bastaǵan.
Soqtyǵys saldarynan borttaǵy jeti adamnyń barlyǵy sýǵa qulap, túrli jaraqat alǵan. Іzdeý-qutqarý jumystarynyń júrgizilýine qarańǵy ýaqyt kedergi keltirgen. Keıin sýǵa batqan kater teńiz túbinen tabylǵan.
Qutqarýshylar bes adamdy az ýaqyt ishinde sýdan alyp shyqqan. Alaıda qalǵan eki adamdy izdeý jumystary uzaqqa sozyldy. Olar keıin jaǵadan shamamen 500 metr jerden tabylǵan. Ekeýiniń de qutqarý keýdeshesin kımegeni anyqtaldy.
Sońǵy adam sýdan túngi saǵat 02:34–te shyǵarylǵan. Ókinishke qaraı, eki adamnyń ómirin saqtap qalý múmkin bolmady.
Oqıǵadan keıin Aqtaýda teńizde serýen uıymdastyratyn kásipkerler áleýmettik jeli arqyly málimdeme jasap, qaza bolǵandardyń jaqyndaryna kóńil aıtty. Olardyń aıtýynsha, apatqa ushyraǵan kater kommertsııalyq maqsatta paıdalanylatyn ekskýrsııalyq nemese jalǵa beriletin keme bolmaǵan.
— Bul katerdiń bizge esh qatysy joq. Bul qonaqtar men týrısterge jalǵa beretin serýendeý kateri emes. Katerdegi adamdar — týystar, bir otbasy. Meniń túsinýimshe, olar katerdi sýǵa túsirip, ózderi úshin serýendep qaıtpaq bolǵan. Kommertsııalyq maqsatta paıdalanbaǵan. Ókinishke qaraı, kater ıesi de osy apattan qaza tapty. Teńiz qatelikti keshirmeıdi. Ártúrli qaýesetke senbeý kerek. Bul jalǵa alynǵan emes, ózderiniń jeke kateri, — dedi kásipker.
Qutqarýshylar turǵyndardy sýdaǵy qaýipsizdik talaptaryn qatań saqtaýǵa jáne mindetti túrde qutqarý keýdeshesin kııýge shaqyrdy.
Buǵan deıin, Aqtaýda kater jartasqa soǵylyp, eki adam qaza tapqany habarlanǵan bolatyn.
