Aqtaýda dzıýdodan jasóspirimder arasyndaǵy Qazaqstan chempıonaty bastaldy
ASTANA. KAZINFORM – Aqtaý qalasynda 2009-2010 jyly týǵan jas sportshylar arasynda dzıýdodan Qazaqstan chempıonaty bastaldy.
Bıylǵy maýsymdaǵy eń aýqymdy jastar dodalarynyń biri bolyp sanalatyn bul jarysqa elimizdiń 17 oblysy men respýblıkalyq mańyzy bar 3 qalasynan shamamen 850 jas dzıýdoshy qatysyp jatyr.
Aldaǵy kúnderi tatamı ústinde myqtylar anyqtalyp, halyqaralyq arenalarda el namysyn qorǵaıtyn bolashaq chempıondardyń esimderi belgili bolady.
Chempıonatty Qazaqstan Respýblıkasynyń Týrızm jáne sport mınıstrligi, Qazaqstan dzıýdo federatsııasy jáne Mańǵystaý oblysynyń ákimdigi birlese uıymdastyrdy. Jarystyń ádil ári joǵary deńgeıde ótýi úshin respýblıkalyq sanattaǵy tájirıbeli tóreshiler quramasy tartyldy.
Jarystyń ashylý saltanatyna Mańǵystaý oblysy ákiminiń birinshi orynbasary Ashat Oralov qatysyp, jas sportshylarǵa sáttilik tiledi.
«Memleket basshysy sport salasynyń damýyna árdaıym erekshe kóńil bólip keledi. Búgingi respýblıkalyq jarystyń ótkizilýi – sonyń naqty dáleli. Osy oraıda óńir basshysy Nurdáýlet Igilikulynyń atynan barlyq sportshylarǵa «Mańǵystaýǵa qosh keldińizder!» degim keledi.
Búgingi chempıonattyń aýqymy erekshe. Bul – Mańǵystaý óńiri úshin zor jaýapkershilik, úlken abyroı ári qýanysh. Mańǵystaý oblysynda sporttyń barlyq túrin damytý baǵytynda keshendi jáne júıeli sharalar iske asyrylýda. Infraqurylymdy jaqsartý, jańa sport keshenderin salý oblys ortalyǵynda ǵana emes, barlyq aýdandar men shalǵaı aýyldarda da qarqyndy júrgizilip keledi. Biz jasóspirimderdi árqashan qoldap, olardyń jan-jaqty damýyna jaǵdaı jasaýǵa tyrysamyz», - dedi Ashat Oralov.
Chempıonattyń strategııalyq mańyzy zor: osy jarystyń nátıjesinde 2026 jyly halyqaralyq týrnırlerde el namysyn qorǵaıtyn kadetter quramasy jasaqtalady. Іrikteý kezeńi bolashaǵynan úmit kúttiretin jas talanttardy anyqtaýǵa múmkindik beredi.
Sonymen qatar chempıonat jasóspirimderdiń sportqa qyzyǵýshylyǵyn arttyryp, óńirler arasyndaǵy yntymaqtastyqty nyǵaıtady jáne Qazaqstanda dzıýdonyń buqaralyq túrde damýyna óz úlesin qosady. Mańǵystaý oblysy dástúrli túrde jekpe-jek sporttarynyń damýyna aıryqsha mán beredi. Osy deńgeıdegi týrnırdiń ótkizilýi óńir sportshylary úshin jańa serpin bolmaq.
Aıta keteıik, Ábýjaqynova Grand Slam jarysynda úshinshi orynǵa ıe boldy.