Aqtaýda dzıýdodan Qazaqstan chempıonaty ótýde
NUR-SULTAN. QazAqparat – Aqtaý qalasynda erler men áıelder arasynda dzıýdodan Qazaqstan chempıonaty ótýde, dep habarlaıdy QazAqparat.
Qazaqstan dzıýdo federatsııasy málim etkenindeı, búgin bastalǵan jarysta 105 qyz, 168 jigit baq synaýda.
Aqtaýdaǵy dodaǵa el quramasynyń birinshi nómirli sportshylary túgel kelgen. Balýandar básekesin Qazaqstan ulttyq quramasynyń bas bapkeri Ǵalymjan Jylgeldıev bastaǵan mamandar baqylaýda.
Jarys sanıtarlyq talaptarǵa saı, kórermendersiz ótýde.
El chempıonatynda alǵashqy bolyp áıelder arasynda 48 kelige deıingi salmaqta jeńimpaz-júldegerler anyqtaldy.
Nur-Sultan qalasynyń ókili Aqmaral Naýatbek fınalda almatylyq Ǵalııa Tynbaevany utyp, chempıon atandy.
Atyraýlyq Abıba Abýjaqynova men qaraǵandylyq Margarıta Bajaeva qola júldege ıe boldy.
El chempıonaty 21 jeltoqsanda márege jetedi. Ár salmaqtyń jeńimpaz-júldegerlerine aqshalaı syıaqy beriledi.
Chempıonǵa 150 myń, ekinshi oryn ıegerine 100 myń, qola júldegerge 50 myń teńge tabys etiledi.
