Aqtaýda dzıýdodan Qazaqstan chempıonaty márege jetti

NUR-SULTAN. QazAqparat – Aqtaý qalasynda dzıýdodan erler men áıelder arasynda Qazaqstan chempıonaty márege jetti, dep habarlaıdy QazAqparat.

Qazaqstan dzıýdo federatsııasy málim etkenindeı, jarystyń sońǵy kúni tórt salmaqta myqtylar belgili boldy.

Áıelder arasynda 78 kg salmaqta fınalda shyǵysqazaqstandyq Nazerke Tileýhanovany utqan almatylyq Zarına Raıfova jeńimpaz atandy. Taǵy bir almatylyq Madına Paragýlgova men aqtóbelik Aıala Merekege qola júlde buıyrdy.

Asa aýyr salmaqta (+78 kg) Almaty oblysynyń ókili Kamıla Berliqash úzdik shyǵyp, osymen ekinshi ret el chempıony atandy. Soltústikqazaqstandyq Nazgúl Maratova ekinshi, almatylyq Aqerke Ramazanova men qyzylordalyq Nurǵanym Turshabek úshinshi orynǵa kóterildi.

Erler arasynda 100 kg salmaqta qaraǵandylyq Islam Bozbaev top jardy. Buǵan deıin 90 kg salmaqta tatamıge shyǵyp júrgen ulttyq qurama múshesi fınalda qyzylordalyq Aıbek Serikbaevtan aılasyn asyrdy. Atyraýlyq Arman Qalıev pen pavlodarlyq Serik Sálmenov qola medaldi qanaǵat tutty.

Asa aýyr salmaqta (+100 kg) fınalda shyǵysqazaqstandyqtar Ádil Orazbaev pen Erasyl Qajybaev bas júldeni sarapqa saldy. Ádil jarys favorıti sanalǵan Erasyldy ıpponmen utyp, chempıondyq ataqty jeńip aldy. Jambyldyq Ǵalymjan Qyryqbaı men qyzylordalyq Elaman Erǵalıev qola júldege qol jetkizdi.

Osylaısha Aqtaýda tórt kúnge sozylǵan el birinshiligi támamdalyp, barlyq salmaqta jeńimpaz-júldegerler anyqtaldy.

Eske sala keteıik, budan buryn dzıýdodan el chempıonatynda tórt salmaqta jeńimpaz-júldegerler belgili bolǵanyn jazǵan edik.