Aqtaýda dzıýdodan halyqaralyq týrnır bastaldy

AQTAÝ. QazAqparat - Halyq batyry Er Shotan Nazaruly júldesine arnalǵan dzıýdodan halyqaralyq týrnır bıyl besinshi ret uıymdastyrylýda, dep habarlaıdy QazAqparat tilshisi.

Jasóspirim ul-qyzdar arasyndaǵy dástúrli jarys 19-20 qazan Aqtaý qalasyndaǵy «Mańǵystaý-Arena» sport kesheninde ótip jatyr.

Shotan Nazaruly atyndaǵy dzıýdo týrnıri alǵash ret 2015 jyly Jańaózen qalasynda oblystyq týrnır retinde uıymdastyryldy. Keıingi jyly respýblıkalyq deńgeıge kóterildi. Al úshinshi jyly jarys oblys ortalyǵyna aýysyp sol jyldan bastap ashyq respýblıkalyq týrnır deńgeıine jetti. Mine, bıyl besinshi jyl alys-jaqyn shet elden balýandar turaqty qatysýda.

Bıyl 2005-2007 jyldary týǵan jasóspirimder Shotan Nazarulynyń júldesi úshin baq synaıdy. Bul básekede elimizdiń barlyq aımaǵy men Reseı, Ózbekstan, Qyrǵyzstan, Ingýshetııa, Qaraqalpaqstannan 600-ge tarta balýan kelgen.

Týrnır jeńimpazdaryna QR «Sport sheberine úmitker» ataǵy beriledi. Komandalyq saıys jeńimpazdary qarjylaı syıǵa ıe bolady:

I oryn 200 000 ₸

II oryn 100 000 ₸

III oryn 50 000 ₸