Aqtaýda dzıýdodan ashyq Azııa kýbogy márege jetti
ASTANA. QazAqparat - Aqtaýdaǵy «Mańǵystaý-arena» sport kesheninde erler men áıelder arasynda dzıýdodan Turar Joldybaevty eske alýǵa arnalǵan ashyq Azııa kýbogy márege jetti, dep habarlaıdy QazAqparat tilshisi.
Qazaqstan dzıýdo federatsııasynyń saıtynan alynǵan málimetke qaraǵanda, atalmysh týrnır 2009 jyldan beri dástúrli túrde uıymdastyrylyp keledi.
Bıyl Azııa dzıýdo odaǵynyń kúntizbesine sáıkes ótkizilgen jarysqa Qazaqstan, Tájikstan, Ózbekstan, Grýzııa, Grekııa, Qyrǵyzstan jáne Mońǵolııadan 100-den astam dzıýdoshy qatysyp, baq synady.
Qazaqstan quramasy 7 altyn, 10 kúmis, 13 qola medalmen jalpykomandalyq esepte birinshi oryndy jeńip aldy. Qorjynynda 4 altyn júlde bar Grekııa ekinshi orynǵa ıe bolsa, 1 altyn, 1 kúmispen Tájikstan úzdik úshtikti túıindedi.
Qazaqstannan Suńǵat Jubatqan (66 kg), Ádil Orazbaev (+100 kg), Áıgerim Ábilqadyrova (52 kg), Anna Kazıýlına (57 kg), Iolanta Berdibekova (63 kg), Zarına Raıfova (-78 kg), Saıda Qapsalyqova (+78 kg) altynnan alqa taqty.
Qola júldege ıe bolǵandar qatarynda batysqazaqstandyq Nurymjan Ǵabbasov ta (90 kg) bar.
Aıta keteıik, Turar Joldybaevty eske alýǵa arnalǵan ashyq Azııa kýbogy lıtsenzııalyq týrnır bolyp tabylady. Jarys jeńimpazdary men júldegerlerine reıtıngtik upaı beriledi. Mysaly, chempıon 100 upaıǵa ıe bolsa, ekinshi oryn ıegerine 60, qola júldegerge álem reıtınginde 40 upaıdan qosylady.
