Aqtaýda dırektor men tárbıeshiniń «tóbelesi»: Ata-analar aqshalaryn qaıtarýdy talap etti
AQTAÝ. QazAqparat - Aqtaýda dırektory men tárbıeshisi «tóbelesken» balabaqshaǵa balalaryn bergen ata-analar tólep kelgen aqshalaryn qaıtarýdy talap etýde, dep habarlaıdy QazAqparat tilshisi.
Bir top ata-ana «Aınalaıyn» balabaqshasynyń aldyna jınaldy. Olar mekemede bolǵan jaǵdaı saldarynan balalarǵa moraldyq nuqsan keldi dep sanaıdy. Aıtýlarynsha, tóbelestiń kýágeri bolǵan balalar birneshe kúnnen beri mazasyz, uıqylary tynyshsyz. Sózderine sensek, baldyrǵandar balabaqshada 10 kún boıy durys tamaqtanbaǵan.
«Balalarym balabaqshadan soń úıge kelgende asqa júgiredi. Bul qalaı? Olar kishkentaı portsııa jegen. Nege qaramaıdy? Balabaqshaǵa beınebaqylaý qoıylyp, tyńdalatyn qurylǵylar ornatylsyn. Eń bolmasa, keshirim de suraǵan joq», - deıdi sábılerdiń biriniń anasy Madına Besembaeva.
Tárbıeshiniń áleýmettik jelide jarııalaǵan jazbalaryna senip otyrǵan jáne kerisinshe, dırektordy qoldap, olardy teriske shyǵaryp otyrǵan ata-analar da bar.
«Balalarymyz bárin kórdi. Men 8 aı boıyna tólegen aqshamdy qaıtarýyn talap etemin», - deıdi taǵy bir ana Álııa Janalıeva.
Keıbir ata-analar búldirshinderine jańa bilim berý mekemesin izdestirýge kiristi.
Eske sala keteıik, «Aınalaıyn» jekemenshik balabaqshasynyń tárbıeshisi dırektory ony soqqyǵa jyqqanyn málim etken bolatyn. Oǵan sebep, tárbıeshiniń mekemedegi «bylyqtardy» foto,vıdeoǵa túsirip áleýmettik jelide jarııalaýy. Dırektor jelidegi aıyptaýlarmen kelispeıdi. Quqyqqorǵaý organdary tergeý sharalaryn bastady. Mekeme qyzmetin ýaqytsha toqtatty.
