Aqtaýda dárigerler astan ýlanǵan meıramhananyń 24 qyzmetkeri jumystan shettetildi

AQTAÝ. QazAqparat - Aqtaýda aýyzasharda dárigerlerdiń astan ýlanýy boıynsha tekseristen keıin meıramhananyń 24 qyzmetkeri jumystan shettetildi. Bul týraly Mańǵystaý oblystyq sanıtarııalyq-epıdemıologııalyq baqylaý departamenti basshysynyń orynbasary Asylbek Sharov málim etti, dep habarlaıdy QazAqparat tilshisi.

Qonaq úı keshenindegi meıramhanaǵa tekserý júrgizilgen. Onda 20 qyzmetkerdiń jalǵan medıtsınalyq kitapsha jasatqany anyqtalǵan. Al tórteýinde múldem bolmaǵan.

Sondaı-aq tekserilgen 21 qyzmetkerdiń jeteýiniń aǵzasynan stafılokok tabylǵan. Oǵan qosa meıramhanadan jaramdylyq merzimi ótken 220 keli kólemindegi 73 túrli taǵam anyqtalǵan.

«Josparǵa saı tekserý jumystary nátıjesinde anyqtalǵan óreskel sanıtarııalyq talaptardy buzýshylar adam densaýlyǵyna ákelip soqqan áreketi úshin «Ákimshilik quqyq buzýshylyq týraly» Kodekstiń 425-babynyń 2-bólimine sáıkes qylmystyq jazalanatyn is-áreketi boıynsha Aqtaý qalasynyń polıtsııa basqarmasyna hat joldandy», - dedi Asylbek Sharov.

Endi bul ispen Aqtaý qalasynyń polıtsııa basqarmasy aınalysady.

Aıta ketsek, 12 sáýir kúni aýyzasharda 16 dáriger atalǵan meıramhanada astan ýlanǵan edi.

Qazir dárigerlerdiń jaǵdaıy jaqsy.