Aqtaýda dáriger naýqastyń betinde 25 jyl turǵan áınek synyǵyn alyp tastady

AQTAÝ. QazAqparat – Aqtaýda dáriger naýqastyń betinen 5 mıllımetr kólemindegi áınek synyǵyn ota jasap alyp tastady. Naýqas 25 jyl boıy óz denesinde shyny bóliginiń baryn bilmeı kelgen, dep habarlaıdy QazAqparat tilshisi.

«Naýqas bet terisiniń deformatsııasyna shaǵymdanyp keldi. Oń jaq qabaǵynan tómen kóz aınalasyna deıin úlken tyrtyǵy boldy. Qolmen ustap qaraǵanda ol jerde bóten qatty nárseniń bar ekeni bilindi. Sosyn jergilikti jansyzdandyrý arqyly 30 mınýt kóleminde ota jasadyq. Teri qabatyn tilgende shólmek synyǵy turdy, alyp tastadyq»,- dedi jaq-bet hırýrgy Edýard Melıkıan.

Naýqas 1997 jyly kólik apatyna túsken. Áınektiń synyǵy sol kezde kirgen bolýy múmkin. Óıtkeni áıel adamnyń oqıǵadan keıin kózi jasaýraıtyn bolǵan.

Únemi aýyryp, diril paıda bolǵan. 25 jyl ishinde qanshama ret dárigerlerge baryp qaralǵan. Biraq eshkim denedegi artyq nárseni anyqtaı almapty.

«Shyny bolǵandyqtan teri astynda eshqandaı ózgeriske túspepti. Eger temir bolatyn bolsa, totyǵyp, osy kúnge deıin anyqtalǵan bolar edi. Naýqas qatty qýandy» - deıdi dáriger.

Naýqastyń alǵashqy shaǵymyna baılanysty da dárigerlik qyzmet kórsetilip, bet terisine plastıkalyq jolmen túzetý engizilgen.