Aqtaýda dárigerge shabýyl jasaǵan er adam qamaýǵa alyndy
AQTAÝ. KAZINFORM — Aqtaýda oblystyq balalar aýrýhanasynyń qabyldaý bóliminde dárigerge shabýyl jasaǵan er adamǵa qatysty qylmystyq is qozǵaldy. Medıtsınalyq mekeme men polıtsııa oqıǵaǵa qatysty túsinikteme berdi.
Aýrýhana bergen málimetke sáıkes, oqıǵa 31 qazanda bolyp, medıtsına qyzmetkerleri polıtsııa shaqyrǵan.
Dáriger balany qajetti tekserýden ótkizip, onyń ákesine tekserý nátıjesin túsindirgen. Mamandardyń aıtýynsha, balany aýrýhanaǵa jatqyzýǵa medıtsınalyq kórsetilim bolmaǵan. Osydan keıin balanyń ákesi kenetten ústeldi teýip, dárigerge tap bergen. Ony birneshe adam áreń ajyratqan. Balalar hırýrginiń jaǵdaıy jaqsy, ol jumysqa shyǵyp, kezekshilikke kirisken.
Mańǵystaý oblystyq polıtsııa departamenti atalǵan derek boıynsha qylmystyq is qozǵalǵanyn málimdedi. Tergeý amaldary júrgizilip, oqıǵanyń mán-jaıy anyqtalyp jatyr.
— 31 qazanda Aqtaý qalasyndaǵy oblystyq kópbeıindi balalar aýrýhanasynda kórsetilgen medıtsınalyq kómekke kóńili tolmaǵan naýqastardyń biriniń ákesi men medıtsına qyzmetkeri arasynda janjal bolǵan. Atalǵan fakti boıynsha polıtsııa qylmystyq is qozǵady. Kúdikti ustalyp, ýaqytsha ustaý ızolıatoryna qamaldy, — delingen habarlamada.
Medıtsınalyq qyzmetkerge shabýyl jasaǵany úshin qandaı jaza qarastyrylǵan?
Qazaqstanda qyzmettik mindetin atqaryp júrgen medıtsına qyzmetkerleri men jedel járdem júrgizýshilerine qorqytý nemese kúsh qoldaný úshin jeke qylmystyq jaýapkershilik belgilengen. Tıisti ózgerister 2026 jylǵy 7 naýryzda kúshine endi.
Qylmystyq kodekstiń 380-3-babyna sáıkes, jaza quqyq buzýshylyqtyń sıpatyna baılanysty belgilenedi.
Medıtsına qyzmetkerine kúsh qoldanamyn dep qorqytqany úshin 200-den 500 aılyq eseptik kórsetkishke (AEK) deıin aıyppul salý, túzeý nemese qoǵamdyq jumystarǵa tartý, sondaı-aq eki jylǵa deıin bas bostandyǵyn shekteý ne aıyrý jazasy qarastyrylǵan.
Ómiri men densaýlyǵyna qaýip tóndirmeıtin kúsh qoldanǵan jaǵdaıda 500-den 1000 AEK-ke deıin aıyppul salynýy múmkin. Budan bólek, túzeý nemese qoǵamdyq jumystarǵa tartý, eki jyldan úsh jylǵa deıin bas bostandyǵyn shekteý ne aıyrý jazasy kózdelgen.
Al kúsh qoldaný adamnyń ómiri men densaýlyǵyna qaýip tóndirse, bes jyldan on jylǵa deıin bas bostandyǵynan aıyrý jazasy taǵaıyndalýy múmkin. Aýyrlatatyn mán-jaılar bolǵan jaǵdaıda jaza merzimi 7 jyldan 12 jylǵa deıin ulǵaıady.
Buǵan deıin, Qaza tapqan feldsher isi: jábirlenýshi MIB tóraǵasynan 35 mıllıon teńge talap etti.
