Aqtaýda dáriger patsıentine 3 mln teńge moraldyq ótemaqy tóleıtin boldy
AQTAÝ. KAZINFORM – Aqtaýda sot plastıkalyq otadan keıin densaýlyǵyna zııan kelgen áıeldiń talap-aryzyn ishinara qanaǵattandyrdy. Sot dárigerden patsıenttiń paıdasyna 3 mıllıon teńge moraldyq zııan ótemaqysyn óndirý týraly úkim shyǵardy. Bul týraly sottyń baspasóz qyzmeti habarlady.
Aqtaý qalasynyń №2 sotynda turǵynnyń hırýrgke qatysty materıaldyq shyǵyndy óteý jáne moraldyq zııan úshin ótemaqy óndirý týraly azamattyq isi qaralǵan. Dáriger medıtsınalyq qyzmetti Qazaqstan Respýblıkasy Densaýlyq saqtaý mınıstrligi bergen lıtsenzııa negizinde júzege asyrǵan.
Sot materıaldaryna sáıkes, 2022 jylǵy maýsymda dáriger áıelge bet pishinin túzetý úshin plastıkalyq ota jasaǵan. Hırýrgııalyq aralasýdan keıin onyń beti men qulaq tusynda qalyń tyrtyqtar paıda bolyp, syrtqy kelbeti ózgergen. Alǵashqy emdeý sharalaryna qaramastan, patsıenttiń jaǵdaıy jaqsarmaǵan. Sondyqtan ol basqa mamandardyń kómegine júginýge májbúr bolǵan.
2025 jyly Almatyda áıelge qaıta túzetý otasy jasalǵan. Alaıda odan keıin bet júıkesiniń bir tarmaǵy zaqymdanyp, jumsaq tinderi deformatsııalanǵan. Sonyń saldarynan patsıent uzaq ýaqyt boıy fızıkalyq jaısyzdyqty bastan ótkergen.
Áıel sotqa júginip, medıtsınalyq qyzmettiń sapasyz kórsetilýine baılanysty 20 mln teńge materıaldyq shyǵyn jáne 10 mln teńge moraldyq ótemaqy óndirýdi suraǵan.
Biraq, sot materıaldyq shyǵyndy óteý týraly talapty qanaǵattandyrýdan bas tartty. Óıtkeni talap qoıýshy keıingi emdelýge jumsaǵan barlyq shyǵynyn qujattarmen rastamaǵan.
Sonymen qatar sot saraptamalarynyń qorytyndylary medıtsınalyq qyzmettiń sapasyz kórsetilýine baılanysty densaýlyqqa zııan kelgenin jáne moraldyq zardap shekkenin rastaǵan.
Osy mán-jaılardy eskere otyryp, sot talap-aryzdy ishinara qanaǵattandyryp, dárigerden patsıenttiń paıdasyna 3 mln teńge moraldyq zııan ótemaqysyn óndirdi. Sot sheshimi zańdy kúshine engen.
Buǵan deıin, Aqtaýda eks-depýtat jeke klınıkada ota kezinde komaǵa túsip, kóz jumǵan bolatyn.
