Aqtaýda búldirshinderden quralǵan urmaly aspaptar orkestri sahnada óner kórsetip júr

AQTAÝ. KAZINFORM – 3-5 jastaǵy aqtaýlyq búldirshinder orkestri kóptiń kózaıymyna aınaldy. Kishkentaı ónerpazdar qoldan jasalǵan urmaly aspaptardy paıdalanady.

Oblystaǵy tuńǵysh balalar orkestri osydan 2 jyl buryn qurylǵan. Jetekshisi – 10 jyldam astam ýaqyt óńirdiń bilim berý salasynda tabysty ári nátıjeli eńbek etip kele jatqan maman Gúlbaný Boranbaeva. 2024 jyldan beri Aqtaý qalasyndaǵy «Aı-Naz» balabaqshasynda jumys isteıdi. Búginde balalardy mýzykaǵa baýlyp, ónerge degen súıispenshilikterin oıatyp júr.

– Balabaqshada mýzyka úıirmesiniń jetekshisimin. Balalarǵa án aıtý, yrǵaqty seziný men sahna mádenıetin úıretemin. Mýzyka – tek dybys emes, ol – emotsııa, tárbıe, tártip. Balalar osy úndestikti sezinip ósip keledi, - deıdi.

Tárbıeshi balabaqshaǵa kelgen balalardyń darynyn birden baıqaıtynyn aıtady. Ánge qumar jas talanttar tek aspapty ǵana meńgermeı, án de aıtady.

– Tárbıeshiniń eńbegi balanyń qabiletin durys baǵyttaı bilýmen ólshenedi. Óıtkeni árbir balanyń boıyndaǵy daryny men qyzyǵýshylyǵyn der kezinde baıqap, durys arnaǵa baǵyttasa ǵana, ol tulǵa retinde qalyptasady, - deıdi G. Boranbaeva.

Onyń kishkentaı shákirtteri Astanada ótetin «Dara bala» jobasyna arnaıy shaqyrtyldy. Sondaı-aq respýblıkalyq daryndy balalar saıysynda aspaptar nomınatsııasy boıynsha júldeli 2-oryndy, halyqaralyq «New star» baıqaýynda aspaptarda oınap, bas júldeni jeńip aldy.

Buǵan deıin eń kishkentaı dırıjer Atyraýda turatynyn jazǵan edik.