Aqtaýda bir top jasóspirim 11-synyp oqýshysyna oq atyp, aýyr jaralady

AQTAÝ. KAZINFORM — Oqıǵa 17-shaǵyn aýdanda kóshede bolǵan. Zardap shekken balanyń aıtýynsha, ol dostarymen kınodan shyqqan. Jolda bir top jasóspirim onyń dosyna tıisken.

Olardy ajyratpaq bolǵanda, bireýi pnevmatıkalyq tapanshamen kózine oq atqan.

— Olardyń ishimdik iship alǵanyn baıqadym. Bizge dóreki sóılep, dosyma tıisti. Sabyrǵa shaqyrmaq boldym. Sol kezde bir bala tapanshamen atyp jiberdi. Oq sol kózime tıdi. Sodan beri kózim múlde kórmeı qaldy. Ushqysh bolamyn degen armanym kókke ushti, — deıdi jábirlenýshi. 

Buzaqylar onysymen qoımaı, qan josa bolyp jatqan balanyń basynan teýip, uryp tastaǵan.

Jasóspirimge birneshe kúrdeli ota jasaldy. Alaıda, kóz janaryn qalpyna keltirý múmkin bolmapty. Anasy Madına Rysmaǵanbetova ulynyń aýyr psıhologııalyq soqqy alǵanyn aıtady. Sondyqtan ol qylmystyq istiń ádil tergelýin jáne kinálilerdiń qatań jazalanýyn suraıdy.

— Aýrýhanada balam qaıta-qaıta kózin suraı berdi. «Mama, kózim qalaı?» deıdi. MRT-da oq bary anyqtaldy. Sodan keıin biz polıtsııaǵa habarlastyq. Biraq áli kúdiktilermen kezdestirmedi. Tapanshamen oq atqandar — 2007 jyly týǵan kolledj stýdentteri, — deıdi jábirlenýshiniń anasy.

Mańǵystaý oblystyq polıtsııa departamentiniń habarlaýynsha, qylmystyq is birinshi QR QK 99-baby boıynsha (adam óltirýge oqtalý) tirkelip, keıin QR QK 106-babyna — «qasaqana aýyr dene jaraqatyn keltirý» aýystyrylǵan. Kámelet jasyna tolmaǵan kúdiktege bultartpaý sharasy retinde elden shyǵýǵa tyıym salynǵan.

— Qylmystyq is QR QK 106-baby boıynsha tergelip jatyr. Kámeletke tolmaǵan kúdikti anyqtaldy. Qazirgi tańda sotqa deıingi tergeý amaldary jalǵasyp jatyr, — dedi Mańǵystaý oblystyq polıtsııa departamentiniń baspasóz qyzmeti. 

Buǵan deıin, Aqtaýda kólik qaǵyp ketken 2 jasóspirimniń jaǵdaıy aýyr ekenin jazǵan bolatynbyz