Aqtaýda bir top úlesker aımaq basshysynan kómek surap, ákimdikke bardy
AQTAÝ. KAZINFORM — 70ke jýyq turǵyn «Grand Avenue — 2» turǵyn úı kesheninen baspana alý úshin ár qaısysy 20 mıllıonnan 45 mıllıon teńgege deıin qarajat tólegen. Qurylys jumystary 2021-jyly bastalǵan.
Aıtýlarynsha, páter kiltteri byltyr berilýi tıis eken, alaıda qurylys toqtap qalǵan.
Baspanaǵa qol jetkize almaı, bolmasa qarajatyn qaıtara almaı júrgen turǵyndar Mańǵystaý oblystyq ákimdigine jınaldy.
— Qansha jyl ótti. Qurylys dep 3 jyl kúttik. Endi mine, 1 jyldan beri qozǵalys joq. Sotqa berip, jeńdik. Biraq odan nátıje bolmaı tur. Aqshamyzdy óndire almaı otyrmyz, — deıdi Jańaózen qalasynyń turǵyny Rınat Qaıyrjan.
Ákimdiktegiler qurylystyń áýel basta-aq, zańsyz bastalǵanyn aıtady. Sondyqtan sotqa shaǵym túsirilgen.
— Qurylys kompanııasy turǵyn úı qurylysyn ruqsatsyz bastap ketken. Eshqandaı qujatsyz, saraptamasyz, jumys jobasy da joq. Sondyqtan ákimshilik jaýapkershilikke tartyldy. Sot qurylysty buzýǵa sheshim shyǵardy, — deıdi oblystyq memlekettik sáýlet-qurylys baqylaýy basqarmasy basshysynyń orynbasary Alǵadaı Qoshtaev.
Al qurylys kompanııasynyń ókili Oljas Muratovtyń aıtýynsha, quzyrly memlekettik organmen medıatıvtik kelisim jasalyp, turǵyn úı qurylysyn jalǵastyrýǵa ruqsat berilgen.
— Qurylysty jalǵastyrý úshin KazNIISA-dan ruqsat alýymyz kerek boldy. Oǵan 6 aıdaı ýaqyt ketti. Sonyń saldarynan qurylys jumystary turyp qaldy. Turǵyndardyń qarajatyn qurylysqa jumsadyq. Biz qashpaımyz, ashyq jınalystar ótkizip júrmiz. Taǵy da dıalog jasaýǵa daıynbyz. Kiltterin beremiz. — deıdi «Garden group building» JShS-niń ókili Oljas Muratov.
Qurylys kompanııasynyń ókili qarjylyq qıyndyqtar baryn jasyrmady. Dese de, kelesi jyldyń birinshi toqsanynda atalǵan turǵyn úıdiń qurylysyn aıaqtaýǵa ýáde berdi.
Buǵan deıin, Mańǵystaýda bilim salasynda 800-den astam adamnyń jaýapkershilikke tartylǵany týraly jazǵan bolatynbyz