Aqtaýda bir top ata-ana alaıaqqa aldanyp qaldy
AQTAÝ. KAZINFORM – Ata-analar balalaryn ulttyq biryńǵaı testige daıyndaıtyn «LETS» bilim berý ortalyǵynda qosymsha oqytyp kelgen.
Ol úshin oqý aqysyn bir jylǵa tolyq tólegen. Aıtýlarynsha, ortalyq basshysy qarajatty ıemdenip, izin sýytqan. Al aılyq jalaqylaryn ala almaǵan muǵalimder jumystan shyǵyp ketken.
- Balalarymyz dalada qalyp otyr. Bul taza alaıaqtyq qoı. Bizdiń árqaısymyzǵa kezinde kelisimshart berildi. Endi qarap otyrsaq, kelisim sharttarda basshylary ártúrli. Dırektorlardyń famılııasy aýysa bergen, - deıdi aqtaýlyq turǵyn Baıan Turǵanbaeva.
Ata-analardyń aıtýynsha, qosymsha bilim berý ortalyǵynda bir aıdyń oqý aqysy - 55 myń teńge turady. Al, eger bir jyldyń aqysyn aldyn ala tólese, 38 myń teńgeden jeńildik jasalady. Sondyqtan turǵyndar jeńildikpen bir jyldyń oqý aqysyn túgel tólep qoıǵan. Balalary alǵashqy kezde jaqsy oqyp, kózge túsken. Alaıda keıin oqý sapasy tómendep ketipti. Sondyqtan ata-analar ortalyq basshysynan aqysyna saı qyzmet talap etip, bolmasa aqshany keri qaıtarýdy suraǵan. Osydan keıin kásipker telefon qońyraýyna da jaýap bermeı, qaladan qashyp ketipti. Alaıaqqa aldanǵan turǵyndar Aqtaý qalasynyń prokýroryna baryp, aryz jazdy.
- Ata-analardyń aryzy aıasynda qala prokýratýrasy polıtsııa jáne basqa da ýákiletti organdarǵa tapsyrmalar beredi. Aryzda kórsetilgen ýájderi jan-jaqty tekserilip, tıisti sharasy qabyldanatyn bolady, - deıdi Aqtaý qalalyq prokýratýrasynyń bólim bastyǵy Baǵdaýlet Ahmetov.
Ǵımaratyn oqý ortalyǵyna jalǵa bergen kásipkerdiń aıtýynsha, oqý ortalyǵynyń quryltaıshysy oǵan 16 mıllıon teńge qaryz. Ol qarajatty sot arqyly qaıtarýdy kózdeıdi.
Aıta keteıik, Wildberries jáne Russ balalardy aldaýdyń jańa alaıaqtyq shemasyn anyqtady.