Aqtaýda bos oryndar jármeńkesinde 35 azamat áskerı qyzmet ótkerýge nıet bildirdi
ASTANA. KAZINFORM — Aqtaýdyń eń iri saýda ortalyqtarynyń birinde Mańǵystaý oblysyndaǵy qorǵanys isteri jónindegi departamentiniń bastamasymen áskerı qyzmetke qabyldaý boıynsha bos oryndar jármeńkesi uıymdastyryldy.
Qorǵanys mınıstrligi baspasóz qyzmeti atap ótkendeı, is-sharanyń maqsaty — qala turǵyndaryn áskerı bólimderdegi bos laýazymdar jóninde habardar etý, oǵan qosa Qazaqstan Respýblıkasynyń Qarýly kúshterindegi merzimdi jáne kelisimsharttyq áskerı qyzmetti nasıhattaý boldy.
Jármeńkege kelgen aqtaýlyqtar garnızon bólimderindegi bos oryndarmen tanysyp, kadr qyzmetiniń ókilderine óz suraqtaryn qoıyp, áskerı qyzmetke ótý tártibi jaıly keńes aldy.
— Іs-shara barysynda qatysýshylar kelisimshart negizindegi áskerı qyzmettiń talaptary men artyqshylyqtary jaıynda tolyq aqparat alyp, merzimdi qyzmettiń erekshelikterimen tanysty. Budan ózge jergilikti áskerı basqarý organdary men kadr bólimderiniń ókilderine suraqtaryn qoıdy, — dedi Mańǵystaý oblysy qorǵanys isteri jónindegi departamentiniń bastyǵy polkovnık Rýslan Baltemirov.
Jármeńke qorytyndysy boıynsha shamamen júz adam áskerı qyzmet týraly tolyq málimet aldy. Onyń ishinde 20 adam kelisimshart boıynsha, al taǵy 15 azamat merzimdi áskerı qyzmet ótkerýge nıet bildirdi.
Odan bólek, áskerdegi qyzmettiń sharttary men artyqshylyqtary kórsetilgen úsh júzge jýyq aqparattyq paraqsha taratyldy.
Uıymdastyrýshylardyń aıtýynsha, mundaı jármeńkeler jeltoqsan aıyna deıin ár apta saıyn ótkizilip turady. Kelesi kezdesýler qaladaǵy túrli saýda ortalyqtarynda jáne Amfıteatr alańynda ótedi.
Buǵan deıin Qarýly kúshterdiń áskerı qyzmetshisi 600 shaqyrymdyq sýpermarafondy eńsergenin jazǵanbyz.