Aqtaýda bolat balqytatyn zaýyt iske qosyldy
AQTAÝ. QazAqparat - Alty jyl boıy toqtap turǵan burynǵy «Kaspıan stal» zaýytynyń ornyna quny 22 mln dollarlyq bolat balqytatyn armatýra zaýyty paıdalanýǵa berildi, dep habarlaıdy QazAqparat tilshisi.
Qazirgi tańda «Aktau Steel» JShS bazasynda 150 turaqty jumys orny ashyldy. Bolashaqta bul kórsetkishti ulǵaıtý josparda bar.
«Zaýytty jańǵyrtý úshin ázerbaıjandyq ınvestorlar 22 mln dollar qarajat jumsady. Búginde kásiporyn jylyna 250 myń tonna bolat armatýrasyn shyǵarýǵa qaýqarly. Óndiris kólemin arttyrý úshin keıinnen nysandy qaıta jańartý da qarastyrylǵan. Bizdiń seriktestiktiń 50%-y qazaqstandyq kompanııa bolsa, qalǵan jartysy sheteldik ınvestorlardyń úlesinde. Aıta ketý kerek, qazirgi kezde Qazaqstanda qurylysta paıdalanatyn armatýraǵa suranys joǵary. Biz óz ónimimizben jergilikti naryqqa shyǵýǵa nıettimiz. Búginde eksportqa úlken tapsyrystar bar», - dep atap ótti «Aktau-steel» JShS metallýrgııalyq zaýytynyń bas dırektory Rıad Mırzoev.
Sońǵy 3-4 jylda ázerbaıjandyq ınvestorlar Qazaqstan ekonomıkasyna 300 mln dollardan astam qarajat salǵan.
«Atalǵan zaýyttyń ashylýy ınvestıtsııalyq belsendiliktiń jarqyn úlgisin kórsetip otyr. Qazirgi tańda Qazaqstanda 800-den astam Ázerbaıjan kompanııasy jumys isteıdi. Bul eki eldiń prezıdentteriniń bizdiń kásipkerler úshin barlyq jaǵdaılardy jasap otyrǵany dep bilemiz», - deıdi Ázerbaıjan Respýblıkasynyń Aqtaýdaǵy bas konsýly Elhan Zeınalov.
