Aqtaýda bolashaq urpaqqa amanat etilip, 50 jyl buryn jazylǵan hat ashylady
ASTANA. QazAqparat - Aqtaýda 2017 jyldyń qarasha aıynda 1967 jyly bolashaq urpaqqa amanat etip salynǵan kapsýlany ashý josparlanýda, dep habarlaıdy QazAqparat lada.kz saıtyna silteme jasap.
Abaı atyndaǵy mádenı ortalyqtyń aldyna ornatylǵan eskertkish stela osy kúni Aqtaý qalasynyń turǵyndary men qonaqtarynyń nazaryn ózine aýdartýda. Mańǵyshlaqty ıgergen azamattardyń amanaty boıynsha keleshek urpaqqa arnalǵan kapsýla 2017 jyldyń 7 qarashasy kúni ashylýy tıis.
Stelada: «Mańǵyshlaqty ıgerýshilerden 2017 jyldyń urpaqtaryna», dep jazylǵan. Onyń ekinshi betinde kapsýla ornatylǵan data - 1967 jyldyń 7 qarashasy jáne «2017 jyldyń 7 qarashasy kúni ashý» degen jazý bar. Úshinshi jaǵyna oraq pen balǵanyń sýreti oıyp salynǵan.
Kapsýla ornatylǵan kún týraly estelikterimen Lıýdmıla Nıkolaevna Mýhortova bólisýde. Ol kezde ol Shevchenko qalalyq Halyq depýtattary keńesi atqarýshy komıtetiniń bólim basshysy bolyp qyzmet etken.
«2017 jyldyń qarashasynda bolashaqqa arnalǵan hat salynǵan kapsýlanyń ornatylǵanyna 50 jyl tolady. Bul shara 1967 jyldyń 7 qarashasynda Uly oktıabr revolıýtsııasyna 50 jyl tolýyn atap ótýge oraılastyryldy», - deıdi Lıýdmıla Nıkolevna.
Onyń aıtýynsha, kapsýlany ornatý sharasy saltanatty jaǵdaıda ótti. Oǵan Sotsıalıstik eńbek eri ataǵyna ıe azamattar, óndiris ozattary, munaıshylar, ustazdar men №1, №4 jáne №5 mektepterdiń oqýshylary shaqyryldy.
Urpaqqa arnalǵan hatty №1 mekteptiń oqý ozattary Artýr Kamalıdenov pen Marına Ostapenko aldymen jınalǵan jurtqa oqyp berip, keıin kapsýlaǵa salǵan.
