Aqtaýda bokstan Qazaqstan birinshiligi bastaldy
ASTANA. QazAqparat - Aqtaýda bokstan Qazaqstan chempıonaty bastaldy, dep habarlaıdy QazAqparat tilshisi.
QR Ulttyq olımpıadalyq komıtetiniń baspasóz qyzmeti habarlaýynsha, chempıonatqa 198 boksshy qatysýda. Bes kúnnen soń Aqtaý sharshy alańynda shyn myqtylar anyqtalyp, ulttyq qurama qaıtadan jasaqtalady.
Osy oraıda aıta keteıik, AІVA bokstan Olımpıada júldesi sarapqa salynatyn salmaq dárejelerin azaıtqany belgili. Budan bylaı tórtjyldyq dodasynda 8 salmaq dárejesi boıynsha jekpe-jek ótedi. Alaıda, Qazaqstan birinshiligindegi kezdesýler on salmaq boıynsha ótýde.
Bıyl tóreshiler quramy da jańartyldy. Birinshilikti ádil ótkizý maqsatynda «úsh juldyz» deńgeıindegi sheteldik ádilqazylar Qazaqstan chempıonatyna shaqyrtyldy. Olar kúmán týdyrǵan kezdesýlerde jeńimpazdy anyqtaýǵa kómektesedi.
El chempıonatyna ulttyq qurama men «Astana arlandary» sapynda kózge túsken boksshylardyń basym bóligi qatysýda.
Atap aıtar bolsaq, álem chempıony Qaırat Erálıev, Azııa oıyndary men álem chempıonatynyń kúmis júldegeri Ábilhan Amanqul, Rıo Olımpıadasynyń kúmis medal ıegeri Vasılıı Levıt, Azıada júldegeri Aslanbek Shymbergenov, Temirtas Júsipov, Bekdáýlet Ibragımov, Zákir Safıýllender bar.
Eske sala keteıik, ulttyq qurama kapıtany Ádilbek Nııazymbetov bokspen qosh aıtysty. Jaqyn arada komandanyń jańa kapıtany saılanady.
