Aqtaýda blogerler men jarnamaǵa senip aqsha salǵan úleskerler páterin ala almaı júr
Aqtaýda «Sultan», «Aq qala», «Murager» turǵyn úılerine úleskerler aqsha salyp, 3 jyldan beri baspanasyn ala almaı júr. Keıbir turǵyndar jarnamasyna sengenin aıtyp shaǵymdandy, dep habarlaıdy QazAqparat tilshisi.
«Isa grýpp» JShS-ne qarasty «Sultan», «Aq qala», «Murager» turǵyn úıleriniń úleskerleri Aqtaý qalasynyń ákimi Ulyqbek Tnalıevpen kezdesti.
Kezdesýge Mańǵystaý oblysy memlekettik sáýlet-qurylys baqylaý basqarmasynyń basshysy Dáýren Ótepqalı, Aqtaý qalasynyń prokýrory da qatysty.
Salymshylardyń aıtýynsha, «Sultan» turǵyn úı kesheniniń 2-4 qabaty turǵyzylǵan.
«Muragerde» 4 qabat qana salynsa, «Aq qalanyń» irgetasy ǵana quıylǵan.
— 2020 jyly bastalǵan qurylys áli bitken. Biz búkil jıǵan-tergenimizdi saldyq. Endi úılerdiń qurylysy jalǵasa ma, álde toqtaı ma? Buryn qaıda qaradyńyzdar? Nege erterek teksermedińizder? — dedi úlesker Aqkenje Jumaǵazına.
Osy máselege oraı qala basshysy tergeý jumystary aıaqtalǵan soń naqty jaýaby belgili bolatynyn jetkizdi.
— Qansha aqsha ketkenin, árbir turǵyn úı qansha paıyzǵa qurylysy aıaqtalǵanyn tekserip, naqty shyǵyndy eseptegennen keıin is sotqa jiberiledi. Sot sheshimine sáıkes qurylys kompanııasy úleskerler qarajatyn qaıtarýy nemese qurylysty aıaqtaýy tıis. Osyndaı sheshim shyǵady dep josparlap otyrmyz. Tergeý jumystary aıaqtalǵannan keıin naqty belgili bolady, — dedi Aqtaý qalasynyń ákimi Ulyqbek Tnalıev.
Al jınalysqa kelgen keı turǵyndar úıge aqsha salý úshin jarnamaǵa sengenin aıtty.
— Bul máseleni nege erterek zerttep, qozǵamadyńyzdar? Turǵyn úıge aqsha salmas buryn jarnamasyn qaradym. Shyny kerek, qyzyldy-jasyldy banner, jarnama paraqshalary qalada ilinip turdy. Soǵan senip aqsha saldym. Oǵan qosa el tanıtyn blogerler de jarnama jasady. Sondyqtan senimdi kompanııa shyǵar dep oılap qaldyq — dedi úlesker.
Sonymen qatar, Aqtaý qalasynyń ákimi turǵyn úılerdi qajetti ınfraqurylymmen qamtamasyz etpeı turyp, jańa turǵyn úı salýǵa ruqsat berilmeıtinin aıtty.
— Qalada kóptegen qurylys nysany salynyp jatyr. Soǵan baılanysty ınfraqurylym máselesi ózekti bolyp tur. Keıbir turǵyn úılerge jaryq, sý, jylý jetpeı jatyr. Infraqurylymdy búkil úıge jetkizbeı, jańa úıler salýǵa ruqsat berýge bolmaıdy, - dedi ol.
