Aqtaýda bloger qaraýsyz qalǵan ıt-mysyqty tamaqtandyrýdyń ózgeshe jolyn usyndy
AQTAÝ. KAZINFORM — Aqtaýlyq Vladıslav Prohorov ózi oılap tapqan radıomen basqarylatyn oıynshyq kólikti beınekamera jáne arnaıy tabaqshamen jabdyqtap, qańǵybas janýarlardy qorektendirip júr.
Óńirdiń qoǵamdyq kommýnıkatsııa ortalyǵynyń málimetinshe, qala turǵynynyń bul áreketi kópshiliktiń súıispenshiligine bólenip úlgergen.
— Bir jyldan astam ýaqyt buryn ıesiz qalǵan ıt-mysyqty kúndelikti qalaı tamaqtandyratynymdy kórsetetin blog júrgize bastadym. Buralqy ıtter men mysyqtardyń tańsyq áreketi, qoregine aýyz salmas buryn jıi ıiskeıtini meni tań qaldyrdy. Janýarlardyń óz azyǵy úshin aıla-qýlyǵy túsirilim barysyndaǵy eń qyzyqty kadrlar deýge bolady. Meniń mundaǵy kózdegenim — qoǵam nazaryn ıesiz janýarlarǵa aýdaryp, olarǵa qamqorlyq jasaýǵa úgitteý. Áreketimniń nátıjesinde adamdar qańǵybas ıtter men mysyqtarǵa tamaq berip bastady. Men úshin bul úlken kórsetkish bolyp otyr, — deıdi Vladıslav Prohorov.
Sondaı-aq, blog avtory aýrý mysyqtar men ıtterdi emdeıtinin aıtyp otyr.
— Túsirgen beınejazbalarymda mysyqtyń aýyryp turǵany baıqalsa, kórermenderim ony emdeýge usynys tastaıdy. Tipti, keıbireýleri mysyqty emdeý úshin aqsha jiberedi. Mysaly, 12 jastaǵy Markız esimdi mysyqty kezdestirdim. Onyń jaǵdaıy ózge mysyqtarmen únemi tóbeleskendikten óte nashar edi. Markız ómir súrgen aýlanyń turǵyndary ony maǵan birden bergisi kelgen joq. Dese de, olardy kóndirip aýyryp turǵan mysyqty 5 kún boıy dárigerge aparyp, emdep aldym, — dedi Vladıslav Prohorov.
