Aqtaýda bir jasar sábı kópqabatty úıdiń terezesinen qulap ketken

AQTAÝ. QazAqparat - Sábı mıy shaıqalyp, súıektiń synýy belgilerimen Mańǵystaý oblystyq kópbeıindi balalar aýrýhanasynda jatqyzyldy, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń habarlaýynsha, reanımatolog jáne neırohırýrg sábıdi qarap, shuǵyl túrde aýrýhanaǵa jatqyzǵan. Qazirgi ýaqytta búldirshinde qansyraý belgisi baıqalmaıdy, sol sebepti oǵan qan quıylmaǵan.

Demalys kúni osyndaı taǵy bir jaǵdaı oryn aldy. Bes jasar bala 26-shaǵynaýdandaǵy kópqabatty úıdiń tórtinshi qabatynan qulaǵan. Qazir naýqastyń jaǵdaıy aýyr, tynys alý apparatyna qosylǵan.

Buǵan deıin bes jasar bala Shyǵys shaǵynaýdanynda ekinshi qabattan qulap, medıtsınalyq kómekke júgingen bolatyn. Abyroı bolǵanda onyń ómirine tónip turǵan qaýip joq.

Osylaısha sońǵy eki aptada úsh balanyń ekinshi, úshinshi jáne tórtinshi qabattan qulaǵan úsh deregi oryn alyp otyr.

Dárigerler ata-analarǵa balasyna muqııat qarap, eń bastysy terezeni ashyp qoıýǵa bolmaıtynyn eske salady.