Aqtaýda bir shaǵyn aýdan aýmaǵy túgeldeı saıabaqqa aınalady
«Biregeı joba qalanyń 40-shaǵyn aýdanynda ornalasqan. Jalpy aýmaǵy – 23 gektar, onyń 15-ine jasyl jelek egile bastady. Saıabaq ishinde 11 sýburqaq jáne sport kesheni bolady, bul nysandardyń qurylysy júrip jatyr. Sondaı-aq, velosıped tebýge, júgirýge arnalǵan joldar men balalar úshin jabyq attraktsıondar ornatylady. Joba jergilikti ınvestor tarapynan qarjylandyrylǵan», - dep málim etti qala ákiminiń baspasóz qyzmetinen.
Bul – Aqtaý qalasyndaǵy ekinshi saıabaq bolmaq. Jalpy, oblystyq tabıǵı resýrstar jáne tabıǵat paıdalanýdy retteý basqarmasynyń málim etýinshe, óńirde irili-usaqty 26 saıabaq bar. Mamandar saıabaq sanynyń azdyǵy sý tapshylyǵyna baılanysty ekenin aıtady.
«Ortalyq saıabaq halyq tynyǵyp, sportpen aınalysatyn eń iri kógaldy oryn bolady. Buǵan deıin boı kótergen saıabaqtardyń aýmaǵy úlken emes, sany da az. Olardyń azdyǵyna birden-bir sebep – óńirdegi sý tapshylyǵy», - deıdi ardager ekolog Orynbasar Toǵjanov.
Aıta keteıik, jańa saıabaqtaǵy kógaldy sýarýǵa jerasty sýlary tartylady. Sondaı-aq, tamshylata sýarý ádisi qoldanylmaq.
Eske salsaq, buǵan deıin Aqtaý qalasyn sapaly kógaldandyrýdyń tıimdi tásili tabylǵany habarlanǵan bolatyn.
Foto: Aqtaý qalasy ákiminiń baspasóz qyzmeti
