Aqtaýda bir otbasy tamaqtan ýlanyp, 3 jasar bala kóz jumdy
AQTAÝ. QazAqparat - Mańǵystaý oblysynda tutas bir otbasy tamaqtan ýlanyp, jedel túrde oblystyq aýrýxanaǵa jetkizildi. Balalardyń bireýi qaıtys boldy, dep xabarlaıdy QazAqparat tilshisi.
Búgin 6 naýqas «taǵamdyq toksıkoınfektsııa» dıagnozymen oblystyq aýrýxanaǵa jetkizilgen. Olardyń qatarynda 2 eresek jáne 4 bala bar.
MO densaýlyq saqtaý basqarmasy baspasóz qyzmeti málim etkendeı, qazir naýqastardyń jaǵdaıy birqalypty aýyr. Aldyn-ala boljam boıynsha, otbasy 11 qarasha kúni saǵat keshki 5-ter shamasynda qýyrylǵan shujyq pen makaron jegen soń ýlanýy múmkin.
Anasynyń aıtýynsha, balalar túngi 1-de aýyra bastaǵan. Áýeli 3-tegi balasy aýyrady. Asqazanyn marganets eritindisimen shaıǵan soń, bala uıyqtap qalady. Tún aýa sheshesiniń ózi men qalǵan balalary da aýyra bastaıdy. Jaǵdaılary nasharlaǵan soń ǵana jedel járdem shaqyrady. Osylaısha, anasy men 3 jasar balasy jan saqtaý bólimine túsedi. Ókinishke qaraı, balanyń ómirin dárigerler aman alyp qala almady. Ol tańǵy saǵat 7-ler shamasynda qaıtys boldy.
Al, qalǵan naýqastar ınfektsııalyq bólimge aýystyrylǵan.
