Aqtaýda Bıler keńesi alǵashqy daýlardy qarady

AQTAÝ. QazAqparat - Búgin Mańǵystaý oblystyq sotynyń tóraǵasy Erjan Daýlıev pen óńirdegi «Bıler keńesi» qoǵamdyq birlestiginiń tóraǵasy Marat Moldaǵulov daýlardy beıbit jolmen sheshý aıasyn keńeıtý maqsatynda ózara yntymaqtastyq jónindegi memorandýmǵa qol qoıdy, dep habarlaıdy QazAqparat oblystyq sotynyń baspasóz qyzmetine silteme jasap.

Kelisimge kelý barysynda daýdy sheshýdiń balama túrleri, sonyń ishinde medıatsııany qoldaný aıasyn keńeıtý, sapaly sot tóreligin qamtamasyz etý, halyqtyń sot júıesine degen senimin arttyrý máseleleri sóz boldy.

«Búgingi tańda sotqa deıin jáne sot tártibinde daýlardy sheshýdiń balamaly tásilderi keńinen qarastyrylǵan. Bıler keńesimen birigip, olardyń qoldanysyn arttyrýǵa barynsha kúsh jumsaýymyz kerek. Bul baǵytta bılerdiń jumysyn qoǵamdyq-quqyqtyq ınstıtýt retinde damytý jáne nasıhattaýǵa baǵyttalǵan is-sharalar ótkizýdi, balamaly ádispen ister qaraýdy júzege asyramyz», - dedi Erjan Daýlıev.

Osydan soń, bıler keńesi tolyq quramda Aqtaý qalasynyń №2 sotyna túsken birneshe talap aryzdy qarady.

Sotqa jazǵan talap aryzynda azamatsha B. óziniń atyndaǵy páterge burynǵy zańdy nekedegi kúıeýi men onyń inisiniń eshqandaı úlesi joq ekenin aıtyp, páterge menshik quqyǵyn tanýdy suraǵan. Sot taraptardyń ókilderine isti medıatsııa arqyly qaraýdy usyndy. Nátıjesinde qorǵaýshylar óz qorǵaýyndaǵy azamattarǵa medıatıvtik kelisimge kelý arqyly artyq shyǵynǵa ushyramaı, isti jyldam ári bitimgerlikpen aıaqtaýǵa bolatynyn, bul úshin isti Bıler keńesiniń qaraýyna berý kerektigin túsindirdi.

Bıler keńesi talap aryzdy qarap, taraptarǵa óz quqyqtary men mindetterin túsindirgen soń, azamatsha talap aryzynan bas tartyp, al jaýapkerler budan bylaı páterdi bólisý týraly daý qozǵamaýǵa kelisti. Eki jaq qol alysyp, medıatıvtik kelisim bekitildi.

Bir kúnde Bıler keńesiniń qaraýyndaǵy 3 is boıynsha kelisim bekitilip, bir is boıynsha taraptar kelisimge kelýden bas tartty.