Aqtaýda bılbordtardaǵy Toqaevtyń sýretteri aýystyryldy
AQTAÝ. QazAqparat - Aqtaý qalasynda bılbordtardaǵy QR Prezıdenti Toqaevtyń sýretteri basqa sýretterge aýystyryldy, dep habarlaıdy QazAqparat Lada.kz saıtyna silteme jasap.
Eske sala ketsek, Memleket basshysy Qasym-Jomart Toqaev Mańǵystaýǵa sapary barysynda jurtshylyqpen kezdesken bolatyn.
«Aqtaýda meniń sýretim beınelengen 14 bılbord ilinip turǵanyn estidim. Meniń oıymsha, bul - múlde orynsyz, men mundaı nasıhatqa muqtaj emespin. Mundaı ákimshilik yjdahattylyq nemenege kerek?», - dedi Memleket basshysy kezdesý barysynda.
«Bılbordtardy Elbasy bas bolyp, qol jetkizgen shynaıy jetistikterimizge arnaǵan jón. Men barlyq deńgeıdegi ákimderge osyny tapsyramyn», - dep qatań tapsyrdy Qasym-Jomart Toqaev.
Búgin Aqtaýda bılbordtardaǵy QR Prezıdentiniń beıneleri basqa sýretterge aýystyryldy. 
