Aqtaýda bazardyń bir bóligi órtenip ketti

AQTAÝ. QazAqparat - Aqtaýdaǵy 22 shaǵynaýdanda ornalasqan «Masat« bazarynda órt boldy. Qyzyl jalyndy sóndirýge júzden astam adam tartyldy, dep habarlaıdy QazAqparat tilshisi Mańǵystaý oblysynyń Tótenshe jaǵdaılar departamentiniń baspasóz qyzmetine silteme jasap.

Departamentte habarlaǵandaı, bazardaǵy órt týraly saǵat 6.55-te qońyraý túsken. Órt saldarynan 17 saýda dúńgirshegi men 14 konteıner, shatyr astyndaǵy 60-qa jýyq sóre janyp ketken.

«Qyzyl jalyn 8.16-da sóndirildi. Qaza bolǵandar men zardap shekkender joq. Tilsiz jaýmen kúreske TJD-niń 65 qyzmetkeri jáne 11 tehnıka, memlekettik emes órt sóndirý qyzmetteriniń 10 qyzmetkeri jáne 2 tehnıka, medıtsına jáne apattar ortalyǵynan 3 qyzmetker jáne 1 tehnıka, 54 polıtsııa qyzmetkeri jáne 25 tehnıka jumyldyryldy. Órttiń shyǵý sebepteri anyqtalyp jatyr», - dedi oblystyq TJD basshysynyń orynbasary Bekbolat Ábdiqadyrov.