Aqtaýda Batyr Júkembaev atyndaǵy boks zaly ashyldy
ASTANA. QazAqparat - Aqtaý qalasynda qazaqstandyq kásipqoı boksshy Batyr Júkembaevtyń atyna «Batyr 777» atty jańa boks zaly ashyldy, dep habarlaıdy QazAqparat.
Bul týraly boksshy óziniń VKontakte áleýmettik jelisinde jazdy.
«Jańa jyl qýanyshty xabarmen bastaldy. Keshe Aqtaý qalasynda Batyr Júkembaevtyń atyndaǵy «Batyr 777» atty jańa boks zaly ashyldy. Qazirgi tańda sport kesheninde óńirdiń 200-den asa bolashaq chempıony jattyǵýdy bastap ketti.
Qazaqta bulaq kórseń kózin ash degen sóz bar ǵoı. Sol sııaqty, bizdiń maqsat - tasada júrgen jas talanttardy taýyp, jattyǵý jasaýyna múmkindik jasap, olardyń jolyn ashý. Sondaı-aq, jastarymyzdy sportqa, salamatty ómir saltyn ustanýǵa shaqyrý edi. Jańa boks zalymyz qutty hám qaıyrly bolǵaı», - dep jazylǵan áleýmettik jelide.
Esterińizge sala keteıik, Batyr Júkembaev kásipqoı boksta 11 jekpe-jek ótkizip, barlyǵynda jeńiske jetti. Onyń 9-yn merziminen buryn aıaqtaǵan. Ol - jartylaı orta salmaqta «IBO International» chempıondyq ataǵynyń ıegeri.
