Aqtaýda basqarýshy kompanııanyń joqtyǵy turǵyndardy jylýsyz qaldyrdy
ASTANA. KAZINFORM — Aqtaýdaǵy 23-úı turǵyndary eki kúnnen keıin jylýǵa qol jetkizdi, dep habarlaıdy Aqtaý qalasy ákiminiń baspasóz qyzmeti.
Búgin, 6 qarashada Aqtaý qalasynyń ákimi Maqsat Muqash 35-shaǵyn aýdandaǵy 23-úıdiń turǵyndarymen kezdesti. Buǵan deıin atalǵan turǵyn úıdiń turǵyndary páterlerine jylý berilmeýine baılanysty shaǵymdanǵan bolatyn.
— Qazirgi tańda másele sheshilip, turǵyn úıge jylý tolyq kólemde berildi. Kezdesý barysynda turǵyndar jylý júıesiniń iske qosylǵanyn aıtyp, máseleniń oń sheshimin tapqanyna rızashylyqtaryn bildirdi, — delingen habarlamada.
Eske salaıyq, 5 qarasha kúni atalǵan turǵyn úıdiń turǵyndary jylýdyń bolmaýyna baılanysty narazylyq bildirgen edi. Máseleniń týyndaýyna turǵyn úıge qyzmet kórsetetin basqarýshy kompanııanyń bolmaýy sebep bolǵan.
Osydan keıin qala ákiminiń tikeleı baqylaýymen tıisti jumystar júrgizilip, turǵyn úıdi jylýmen qamtamasyz etý máselesi tolyq sheshimin tapty.
Aıta keteıik, 15 qazannan bastap Aqtaý qalasynda jylý berý kezeń-kezeńimen bastaldy. Osy kezeńde ystyq sýdyń sapasy ýaqytsha ózgerip, laılanýy nemese quramyndaǵy temir mólsheri artýy múmkin ekeni aıtyldy.
