Aqtaýda balkonnan sekirmek bolǵan 41 jastaǵy áıeldi polıtseıler qutqardy

AQTAÝ. QazAqparat - Aqtaýda polıtseıler áıeldi sýıtsıdten qutqardy, dep habarlaıdy QazAqparat polıtsııanyń Telegram paraqshasyna silteme jasap.

1 qazan túngi saǵat 01.40 shamasynda 102 jelisine Aqtaý qalasynyń kópqabatty úıdiń 5-qabatynyń balkon qorshaýynan áıel adamnyń sekireıin dep jatqany týraly habar tústi.

Shaqyrtýǵa patrýl polıtsııa jasaǵy, kezekshiliktegi kámeletke tolmaǵandar isteri jónindegi ınspektor jáne qala aýmaǵyna túngi kezekshilikke bekitilgen PB arnaıy qabyldaý ornynyń bastyǵy bardy.

41 jastaǵy azamatsha balkon qorshaýyna otyryp, eshkimniń ózine jaqyndamaýyn talap etken.

Arnaıy qabyldaý ornynyń bastyǵy Órken Júsipbekov onymen áńgimelesip, odan asyǵys áreket jasamaýdy ótindi.

Polıtsııa qyzmetkeri áıeldi sózge tartyp, kóńilin aýlap, oǵan jaqyndaı bastady.

Sekirýge daıyn turǵan áıel qolyn jibere bergende tártip saqshysy jyldam áreket etip, sanaýly sekýnd ishinde ony ustap aldy.

Áıeldiń mas ekeni anyqtaldy. Jeke basyn anyqtaý barysynda onyń narkologııalyq esepte bolǵany belgili boldy. Ol buryn da osyndaı áreketke barǵan.

Áıel jedel járdem qyzmetkerlerine tapsyryldy.

Vıdeodan alynǵan kadr