Aqtaýda balyqtan ýlanyp, aýrýhanaǵa túsken 9 jastaǵy balanyń týystary kómek surady
AQTAÝ. KAZINFORM — Aqtaýda balyqtan ýlanyp, aýyr jaǵdaıda aýrýhanaǵa túsken 9 jastaǵy balanyń týystary Astanadan beıindi mamandar shaqyryp, qajet bolǵan jaǵdaıda naýqasty sanıtarlyq avıatsııamen elordaǵa jetkizý máselesin qarastyrýdy surady.
Týystarynyń aıtýynsha, Bekarys Qanatbaıdyń jaǵdaıy birneshe kúnnen beri aýyr. Olar 22 qyrkúıekte Mańǵystaý oblysynyń ákimi Nurdáýlet Qılybaıǵa jáne oblystyq densaýlyq saqtaý basqarmasynyń basshylyǵyna beıneúndeý joldaǵan. Otbasy balany mamandardyń oflaın qarap, konsılıým ótkizýin suraıdy.
Mańǵystaý oblystyq kópbeıindi balalar aýrýhanasy dırektorynyń orynbasary Álııa Eshimovanyń málimetinshe, bala 19 qyrkúıek kúni keshke aýrýhanaǵa aýyr jaǵdaıda jetkizilgen. Oǵan aýyr dárejedegi botýlızm dıagnozy qoıylyp, ınfektsııalyq-toksıkalyq shok jaǵdaıynda túsken. Bala es-tússiz bolǵandyqtan, jansaqtaý bólimine jatqyzylyp, jasandy tynys alý apparatyna qosylǵan. Qazir oǵan qajetti em júrgizilip, botýlızmge qarsy sarysý engizilgen.
— Balanyń jaǵdaıy Densaýlyq saqtaý mınıstrliginiń shtattan tys bas ınfektsıonısti jáne bas reanımatologynyń qatysýymen kún saıyn telemedıtsına arqyly baqylaýda. Sonymen qatar respýblıkalyq ortalyqtan reanımatolog pen ınfektsıonıst mamandaryn Aqtaýǵa shaqyrtý týraly sheshim qabyldandy. Mamandar búgin kelýge tıis, — deıdi dáriger.
Aldyn ala málimet boıynsha, bala 18 qyrkúıek kúni ata-anasymen qonaqta bolǵan. Sol jerde úı jaǵdaıynda daıyndalǵan ystalǵan, konservilengen balyq jegen. Kelesi kúni Munaıly aýdandyq aýrýhanasyna júginip, keıin oblystyq balalar aýrýhanasyna jetkizilgen.
Eske salaıyq, buǵan deıin Basqudyq aýylynda úı jaǵdaıynda daıyndalǵan ystalǵan balyqty tutynǵan úsh eresek pen 9 jastaǵy bala botýlızm belgilerimen aýrýhanaǵa jatqyzylǵan bolatyn. Barlyq naýqasqa qajetti medıtsınalyq kómek kórsetilip, botýlızmge qarsy sarysý engizilgen.
Mamandar botýlızmniń shuǵyl medıtsınalyq kómekti qajet etetin asa qaýipti aýrý ekenin eskertedi. Aýrý kóbine durys daıyndalmaǵan nemese saqtalý talaptary buzylǵan konservilengen ónimderden, onyń ishinde balyqtan juǵýy múmkin.
Eske salaıyq, buǵan deıin Mańǵystaýda balyqtan ýlanǵan tórt adam jansaqtaý bólimine túskenin jazǵanbyz.
